بسم الله الرحمن الرحيم


السلام عليكم ورحمة الله وبركاته:

اولا : اسف على طولة الغيبه ................

ثانيا: اهديكم هذا الهديه المتواضعه ( انشاء الله تعجبكم)







البدايه


للأسف..
كل شي أقدر أقوله في البدايه.. الأسف .
حتى لوجيت آتشرّه..
كنت دايم أعتذر..
عن خطأ أو عن صواب..
وكان هو في كل مرّه..
يعتبر "آسف" عذر..
ويتمادى بالغياب..
قلت حاول بس مرّه..
ياحبيبي تعتبر..
وتعتبر "آسف" عتاب..
قال : آآآسـف !!.





( 1 )

أنا اللي آسف واعتذر عن سواياي
آسف على غلطَتْك وآسف عليّه
الذنب ذنبي والخطايا خطاياي
والاّ أنت ماجا منْك ذنب وخطيّه


( 2 )

حبيبي كثر ماتخطي علي واقول لك معذور
كثر طول إنشغال البال فيك.. وكثر هوجاسه..
أحبّك.. وانت تحكي عن خضوعك لي.. بكل غرور
مثل من يبكي دموع المذلّة.. رافعٍ راسه
أحديصحى علىصوتك ولايصبح صباح النور؟!
أحديغفى علىصوتك ولايحلا له انعاسه؟!


( 3 )

قبلة الله علىصوت العنود الكسول
تتعبه في بعَض الاحيان كلمة: ألو
بس دايم تجاوب بالرضا والقبول
ولوحتّى رفضت وقلت: حتّىولوّ !
كلّما قلت: وش رايك بشيٍ.. تقول:
- قبل ماتدري وش هو الشي - والله حلو !
الحلو والله أنتي جعل عمرك يطووول
وزااادك الله حلاة.. وزااادك الله علوّ
أنتي اتهبّلين وتاخذين العقول
بس من صوتك الكسلان.. وشلون لو..
شافك العاقل بعينه؟!.. يصير امهبوول
ياا بعَد كل من قبلك عليّ أقبلو


( 4 )

قلت: أحبّك. قالت: الحين ضايق صدري
قلت: طيّب ليه؟!.. قالت: كذا.. من حبّك
قلت: حبّي؟!.. ليه وش فيه؟!.. قالت: مدري..
يمكن أنت اتحبّني.. بس أنا ما احبّك.






( 5 )

إيه إبتسم خلّ عنْك الزّعل واللووم
يا علّني ما أعَدَم هالإبتسااامه
ويا علّها بسمةٍ في وجهك تدوووم..
على الرضا والموّده والكرامه
ياا بسمة الحّظ لي قبل أمس ، واليوم ،
وباكر ، وبعده ، والى يوم القيامه
بسْمَتك تجلا العَمَس وتطيّر النوم
وتشعّ في ليلي الموحش ظلامه
البارحة جيتني ضااايق ومهمووم
ماعندك من الكلام إلاّ الملامه
إلين ضيّعت ماعندي من علوم
وجيت أبسلّم وقلت: مْع السلامه !



( 6 )

و ردّت كلّمتني.. قالت : إسمعني، أنا حبّيت.....
هنا قاطعتها : معقول معك الحب يجمعني؟!
تراني والله إنّي قبل تعترفين ماحسّيت..
بطعم الحب عند اللي يعيش الحب.. وش يعني .
هنا قالت -بضحكه-: كل هذا؟!.. صبر وش خلّيت؟!..
دقايق لين أكمّل لك كلامي.. لا تقاطعني
أنا حبّيت.. أقول إنّي.. خلااااص من الملل ملّيييييت..
بسافر.. بس حبّيت.. إنّك الليلة توّدعني.





( 7 )

كلمة "بسافر" بفمّه : خنجرٍ حدبا
تطعن.. وانا كنت بسافر عن طعوني
اللي حفرها برمح عيونه الهدبا
واللي دفنها السهر في ساحل جفوني
الله على من يحَسْب إن السما جدبا
هو مالمح لمع دمع الشوق بعيوني؟!





( 8 )

البارحة كنت أحس بنبرتك لمعه
وتعبت أفكّر بلمع الصوت.. وش يعني؟!
إثرك امكلّم وعينك تذرف الدمعه
حزنٍ علي ياحبيبي يوم تسمعني..
أقول : أنا بإنتظارك ليلة الجمعه
واقول : معقول معك الحب يجمعني؟!
واحكيلك حكاية الكبريت والشمعه
واوّلع الشمع لك حتّى توّلعني
واقول : سولف.. شموع القلب مستمعه
عطني وخذني وشتتني وجمّعني
ياللي على حسنك الأذواق مجتمعه
ماكنت أفكّر بشيٍ عنْك يمنعني
كنت آتكلم وأحلم لين في رمعه
صوتك لمَع دمْع في سمعي وقاطعني
أثرك مسافر وانا احكيلك عن الجَمْعه
أواعدك وأثرك امكلّم توادعني !!


( 9 )

اتصدقين إنّي عرفت السالفه قبل اتحكين
لكن تصنّعت الجهل لين اتحكين السالفه
جيتي ومن صوتك عرفت إنّك نويتي ترحلين
كنّك على نقض الجروح اللي تشافت حالفه !
فعلاً قدرتي نقضها والله على الفرقا يعين
قلب الحنين اللي معك حظ الشقا ماحالفه
ماعاد باقي للغلا دمعه ولا للدمع عين
نضحك على انفسنا إذا قلنا الظروف مصالفه
من حيرتي من غيرتي والشك لاتستغربين
إستغربي من بعدنا وقلوبنا متوالفه
أخطيت أحَسْب إنّي معك بقطع مشاوير السنين
وأثر الطريق يظمّنا بس الخطى متخالفه
لا للوفا أو للغلا أو للرضا أو للحنين
أو للدموع اللي تبي تسقي العروق التالفه
أنا هويت ومادريت إن الهوى : طفلٍ حزين
بكى من أوّل ماحكى.. ما تمّ كل السالفه


( 10 )

ياللي تحَسْب إن السهر : كحل بيديك
لو هو كحل.. عميت عيون السهارى
من حيرتي ما فاد كثر الحكي فيك
واليوم جرّب كيف صمت الحيارى
أنا اللي الشرهه علي ليه أداريك
وانا أدري إنّك ماانت كفو المدارا



ياالله ياللي كل هالنّاس ترجيك
الأغنياء والمعدمين الفقارى
تفرج لمن ضاقت عليه المساليك
عاقل وضيقاته بصدره سكارى
وإنّك تيّسر لي بدنيا التهاليك
رفيق عزٍ بالوفا مايجارا
وآموت به وآقول له ميّتٍ فيك
عشق الرجَال يفوق عشق العذارى





( 11 )

ليت الوفا للناس مثل العباده
ليته ركن ثابت من أركان الإيمان
حتّى يثاب المجتهد لإجتهاده
ويعاقب العاصي على كل عصيان


( 12 )

أو ليت ربّي يوم فرّق بالاشكال
في نسبة الإحساس ساوى عبيده
عجزت لاالقى فالرجاجيل رجّال..
ياقف معي وقفة عضيد لعضيده
و يمدّ ليديني من عروقه احبال
حتّى قبل مااطيح أجوّد وريده





( 13 )

قد قلتها لك سر ولغيرك إعلان
يا واحدٍ...................
أنت الوحيد اللي من أهل الزمن كان
وسط الوحيد اللي بوسط الحنايا
ماكان فوق الأرض لي غيرك اخوان
وأبو وأهل وعيال عم وحمايا
فيك إختصرت الناس في هيئة إنسان
بلا عيوب ولا ذنوب وخطايا
وربطت بك كل الأماكن والأزمان
كأنّها : الأعمال وانت : النوايا
ماكنت منْك بغير الإنصاف طمعان
ولاكنت غير ارضاك أدوّر عطايا
الله يجازي راع الإحسان بإحسان
ويجازي الأشرار شر الجزايا
ويامهدي الضحكة علي وانت زعلان
لو بس ترضى مانبي لك هدايا
ماللهدايا شان في كل الأحيان..
عند العمى دام الهدايا : مرايا !
لابارك الله بالقوافي والأوزان
للشاعر.. إن مابيّحن الخفايا
ولا تعدّن الكتابة علىشان..
مدح الرجال أو وصف زين الصبايا
ماقلتها لك.. لكن أقولها الآن :
أبرأ إلى الله من جميع البرايا !!




اللاّ نهايه

اللاّ نهايه..
ماهي إلاّ نهايه..
للأسف .
والأسف..
اللي مااقدر أقوله في النّهـايه..
إنّهـ آيه.. !!.








تحياتــــــــــــــــــــــــــــــي: