دعوة"افتح قلبك للجميع"

موضوع اليوم بيكون شي للجميع ...

طبعا كل واحد وده يعرف شي عن الاخرين او يحب انه الاخرين يعرفون عنه اشياء معينه
ومن خلال موضوع افتح قلبك للجميع راح ابداء بنفسي واتكلم عن شخصيتي المتواضعه من عدة نواحي انا احب اتكلم فيهاعن شخصيتي المتواضعه او افكاري او اراء لي في اشياء احب انه الباقيين يعرفونهااو اشياء في المنتدى او عن الاعضاء او اي شي يمكن انه يقال واحس انه بيوضح للاخرين عن شخصيتي راح احاول اتكلم فيه من خلال هالموضوع اللي اقل مايقال عنه هو افتح قلبك للجميع لاخوانك في المنتدى ..


* ملاحظة / ترى الموضوع اعتبروه زي المقابله او اللقاء بس انت المذيع والضيف ..





... طبعا اسمي بسمة عمري 23 وحيدة امها وابوها دلوعه نوعا ما طولي 160 ووزني42



... اتوقع لو شركة الاتصالات بتعطي دروع للمشتركين المميزين راح يعطوني معهم لاني منتظمه وكاسبين مني كسب سواء جوال او ثابت ماتاخر ابدا حتى البيجر اسدده وانا ماعندي جهاز بس بيني وبينكم مصخوها لازم يخفضون بسرعه === اللي يشوفه يقول بتتركهم



... عندي مواقف لو احكيها لاحد بينشل من الضحك بس للاسف غير صالحه للنشر وحلاوتها في حكايتها وليس كتابتها === صرفتها



... اللي مايعرفه الكثيرين اني كنت بيضاء بس الشموس لعبت فيني الين تحولت الى صفرا من الشوارع اللي اعتبرها مدرسة تفتح 24 ساعه وانا صغيره



... كل ماتذكر اني قد شريت بيجر بثلاث الف ريال اضحك على نفسي ضحك انواع الهبال والحين مدري وينه اذكر اني عطيته وحده من صديقاتي ايام الطفره

والسبب اهلي اعطوني وجه الله لايحرمني منهم

... انا وحده مبذره وللاسف اني عارفه هالشي احب اشتري اي شي يعجبني وخاصة الملابس السبور والرياضة والبناطيل المقحطه



ماحب المواد العلميه بس احب التاريخ والاجتماعيات وعلم النفس بشكل مخيف - اتمنى نشوف شي اسمه الكتاب المسموع لانه ماعاد فيه فرصة للقراء زي اول .




... ممكن الكثير من الاعضاء مايدرون عني لاني جديده عليهم احب اكون ظل خفيف على المنتدى واهله



... طبعا انا كثيرين يسالوني ليش اخترت هالاسم ( المملوحه طبعا اختصار مادري جت على بالي <<<<واثقه من نفسها



... كثيرين من الاعضاء يزعلون لاني مارد علي بعض مواضيعهم وانا مارد عليهم بسبب دراستي انا ادرس بامريكا مع ابوي وامي ووقتي مايسمح لي



... مدري ليش كثيرين يربطون بين احداث قصصي وبين شخصيتي بانها صايرة لي شخصيه وانا كل قصصي من ماسمعه ومخيلتي اللي بتضيعني في القريب العاجل ..



... يعجني العضو اللي يخترع موضوع من راسه حتى لو كان بسيط وخاصه انه المنتدى اسهل مافيه مميزاته بس الحق يقال فيه مجموعه من الاعضاء يعجبوني .



... اكره شي عندي بالنت هو التشات ولايهون البال توك لاني اعتبرهم قمة السخافه البشريه رغم انه فيهم شي كويس بس نادر جدا ً <<<كنت 24 ساعه بالشات الين كرهته



... تدرون اني اكره شي عندي بالاكل ولايمكن اكله هو ( الكاتشب - جبن الكيري - الشعيريه - الحليب - المحاشي - المخللات - كورن فليكس – ورق العنب ) واحب الفرواله مرره والسليق حق امي ماحب اللحم والبيض





... كنت مدمنه شي اسمه افلام عربيه واجنبيه لدرجه انه مخي صار ارشيف بس خفيت من تالي واحب شي اسمه نادي الهلال وعندي ارشيف رياضي بس مليت احب اجمع كاركتير الهليل لدرجة عندي فوق 1500 كاركتير بس من تالي انشغلت عنها الاغاني علاقتي معها من خلال الدش والنت



... اكره شي عندي اللي يناقش بموضوع مايفهمه وهو حاط كلام منسوخ خاصة المواضيع الدينيه او الطائفيه لانه ممكن تكون نقطه ضعف حتى لو كنت الصح .



... يعجبني العضو اللي يطور نفسه بسرعه ويستفيد من اللي حوله .



... اكره ماعندي العضو اللي مايتابع مواضيعه خاصه اللي فيها نقاش وخاصه اللي فيها ردود حلوه مثلي



... يعجبني العضو اللي مايحط مواضيع كثيره واكره العكس خاصه اللي يمشي وينطل مواضيع لدرجه معاد تفكر تفتح له موضوع وشلون عاد ترد ولا كلها نسخ ولصق .




... جتني فترة في حياتي قررت اصير شاعر ه وطلع من ذمتي قصيدتين وحده رثاء في ولد عم لي ( اللله يرحمه ) والثانيه غزليه نصفها مسروق ومن بعدها اقتنعت اني ماعرف شئ



... في فترة من حياتي كنت ابي اتعلم اعزف عود وبقدرة قادر تحولت الى عود اسنان لاني اكتشفت انه ظروفي المحيطه لايمكن تساعدني واكتشف اللي بداخلي === ايه هين



... عندي مبداء حب المعرفه لاي شي زين شين لازم اعرفه لدرجه ماتتخيلونها



... ادين لابي وامي ماوصلت له في حياتي لانهم شدو علي وارخو علي وتحملوني بشكل ماتصدقونه





... فيني عيب عصبيه لدرجه ماتتوقعونها وزعوووووله


... احب شي اسمه ضحك وسعة صدر لدرجة انه جوالي فل من الرسايل وهو يشيل 160 رسالة





... الاعضاء لهم مكانه في قلبي كبيره - واحب البنات اكثر هههههههه



... اللي مايعرفه الكثير اني عمري ماكتبت قصة بقلم او ورقه كل قصصي على الكيبورد والنت بس لازلت اعتبر نفسي مبتدئه في الكتابة .



... اكثر شي استفدته من النت هو معرفة اشخاص اعتبرهم كنز في حياتي وهم المكسب لي واستفدت من كتابات بعض الاعضاء المميزه .








حاولت ماكون جديه عند فتح قلبي حتى مايكون الموضوع رسمي بزود ..
واتمنى كل واحد يفتح قلبه للجميع ;)

;) ;)