أحب السمر

أحب السمر واشعر بالسعـــاده ××× إذا من شفتهن أو قابلنــــــي

لاجل عيناك من طول بعـــــاده ××× أعاف البيض مهما شاغلنــي

حبيبي عايش بعدك نكــــــاده ××× ولا ادري كيف نايم ومتهنــي

وانا السهران ما يعرف رقــاده ××× طوال الليل طيفك يمتحنــــي

سحرتيني وفي سحرك زيـــاده ××× معاد اقدر أسولف وارجهنــي

خذوني للمطوع قال صــــــاده ××× سحر سمــرا إذا ما غاب عنـي

يفكه واحد علمه وكـــــــــــاده ××× بجنب اطويق ساكن ومتدنـــي

ورحنا ندوّره نجهل بــــــــلاده ××× وننشد كل عجل ومتونـــــــي

واخيرا حول غـار في الحمــاده ××× لقينــــــا شايب فيه متثنـــــي

وطالعته وطالع في ركـــــاده ××× تبســم ، ثم كشــر، ثم ونـــي

وقال وليدكم ما منه فــــــاده ××× معه وحــده واخـاف إنه يثنــي

إذا رحتوا فشوتوا في الوساده ××× تلاقــوا شي من ذولا وذنـــــي

ورجعنا البيت نبحث في الــوساده ××× لقينا في الوســادة شي بنــي

وبها حرفين ما فيها زيــــاده ××× تخلي القـــــلب ذاهل ومتعنــي

حرقناها وحرق العمل عــــاده ××× أحسب إني خلصت وخاب ظنــي

لأن الحب عن قصــــد وإراده ××× يفوق السحـــر في ذوق وفنـي

لقيت الله يبلى به عبـــــاده ××× ولا له حل عند انسي وجنــــــي