المسبحة

انت ما تدري ان جرح المشاعر ما يطيب * لو عرفت الجرح ما كان قلبي تجرحه

محترف تركيب الاعذار واسلوبك رهيب * وان كشفتك تدعي انه مزاحاً تمزحه

ليه لو ظنيت بك خير ظني بك يخيب * كان ظني بك غلط ليه ما بتصححه

ليه تخفي ما بداخلك وانت امرك مريب * امر لو حاولت تخفيه عينك نفضحه


كل موقف منك احلله والقى فيه ريب * هو قصد..لا ما قصد..لا قصد.. ليه اسمحه

كم وكم فّهمتك ان الذي تفعله عيب * كم وانا خاطب ضميرك وادله وانصحه


باب جا لك منه ريحاً وتعذيب ولهيب * ليه اذا قفلت مصرعه ترجع تفتحه

كم شرحت الوضع لك وانت تسمع ما تجيب * ثم تخطي فيه وارجع واعيده واشرحه

واعتبرها حسن نيه -على قولك- وطيب * واعتبر ذنبك براءه واغمض وادمحه

ما اذكر اني قد تلفظت بالفاظاً تعيب * كنت اذا شفت الخطا منك اجر النحنحة

يوم طفر الكيل واصبحت من جرحك عطيب * إي نعم قلبك تعمدت اغيضه واجرحه

الجروح قصاص والبادي اظلم يالحبيب * وان خسرت اليوم لا بد بكره تربحه

يا لبيب اسال مجرب ولا تسأل طبيب * كل مغروراً بنفسه غروره يذبحه

انت فهمك للهوى للآسف فهماً عجيب * في نظرك انه مجرد تبادل مصلحه

الوكيل الله دنت شمس حبك للمغيب * كلها يومين وانساك والهم وامسحه

شامخاً ما تنحني هامتي راسي صليب * ما خلق ربي بعد شخص اجيه استسمحه

موغريب انا افترقنا ولكن الغريب * ليه اذا جابوا لي اسمك مسكت المسبحه ؟؟؟


[فقط الأعضاء المسجلين يمكنهم رؤية الروابط. ]