الجزء الثاني
حمد : هلا حبوبه .. شو اسمج؟
البنت : اتمي لودة
حمد : حيالله روضه ..
مانع : شو تبابها بنت العرب؟
حمد : وانته شو تبابي .. اهالها اللي هم اهلها ما اعترضوا انته بتعترض والله حاله ..
مانع : خل عنك ..المهم بو شهاب احس اني اعرف هالبنت او اني شايفنها مكان بس ما اذكر وين..
حمد : الله يهداك انته بس .. محد عنا في العايلة ع سناها غير ميوود..
مانع : ما ادري والله.. بس تاخذ شوي من رفيعه ولا ما ادري شو اسمها.. وهيه بنت ولد عم بنات خالتيه عليا ..
حمد : فديتها والله.. اعديبها يوم كانت ام سنه ومن سنين تقريبا انتقلوا بوظبي والحين تقوللية اميه انهم من شهرين في المانيا عسب علاج امها وبييون جريب .. وما ادلهم جان ردوا ولا بعدهم .. فديتها والله كانت وايد متعلقة فيه وانا بعد كنت متعلق فيها واتصدق حتى شكلها نسيته ..
مانع : وتحيد عمتها والله حتى نسيت اسمها المهم .. تحيد قبل يو كنا دوم نتضارب وياها هيه ومهرة وميره وكنا مرة ما نتدانا ..
حمد : وتذكر سالفتك يو ظربت ميره ما ادري مهرة ومطيت شعرها عسب ما كانت تلعب ويانا وهيه كانت تصيح وتسير صوب امها
مانع :هي والله اذكر وحتى كان ويانا اخوك غيث ..
حمد : صدقك والله( ويفتر صوب روضه) اقول حبوبة شو رايج نتحوط شوي ؟
مانع :حووه يا الخدية سير صوب هلها وتخرص منهم هب الا تاخذها منيه والدرب
حمد : أكيد بسير ..
وقام حمد وسار صوب طاولة البنات فسيدة ربعت روضه صوب امها اللي كانت لابسه نقاب ..
حمد : السلام عليكم
ام روضه وعمتها : وعليكم السلام والرحمه
روضه قابظه عباة امها وتهزها
روضه : ماماتي ابا الووح ويا أمد
ام روضه : لا ما شيء سيره .. الحين بنروح
حمد : لو سمحتي ختيه ممكن آخذ بنتكم عسب أحوطها شوي؟
وما شاء الله على حمد الله عاطنه وسامه وويه سمح واللي يشوفه يقول انه طيب ولو ما يعرفه ..
ام روضه : صدقي اخويه بتتعبك .. ما شاء الله عليها ما تقر في مكان واحد ..
حمد : ما عليج .. متعود ..
ام روضه : على راحتك اخويه بس ياليت انك ما تتأخر علينا لاننا عقب شوي مروحين
حمد : ان شاء الله الشيخه
شل حمد روضه وسار ويا مانع عسب يحوطون روضه .. فساروا سيده صوب محل الألعاب فاشترى حمد لروضه دبدوب بني متوسط الحجم وكان في المحل زحمه شوي فلقوا صعوبه شوي يوم حاسبوا وعقب ما حاسبوا ساروا صوب باسكن روبنز واشترا كل واحد منهم اسكريم .. وعقب ردوا صوب الكوفي شوب فما لقوا اهلها هناك ..
حمد : مانع .. شو الراي الحينه ؟
مانع : بنتريا شوي واذا ما يووا بنسير ندورهم..
حمد : واذا ما يووا ؟
مانع : لا ان الله راد بيوون ..
وعقب فتره .....
حمد : والحين؟؟
مانع : والله علمي علمك؟
حمد : البنت تنود تبغي ترقد
مانع : شو رايك نسير الموقف ندورهناك لأني يوم نزلنت لمحت ريال فيه شبه من روضه واتصدق ان فيه شوية شبه من خليفه ولد عم بنات خالتيه عليا ..
حمد : يالله نسير .. الرقاد موصل حده عند البنت
مانع : يالله عيل قوم ..
عقب ما ظهروا من الكوفي شوب ساروا صوب موقف السيارات فحصلوا حرمه متنقبه عاطيه ظهرها لهم ويالسه ترمس بالتلفون ..
أول ما صدت ام روضه صوبهم نزلت على مستوى روضه وفتحت ايدها من بعيد .. اول ما شافت روضه امها طار الرقاااد عنها وربعت صوبها ولوت عليها ..
ساروا حمد ومانع صوبها ..
حمد : السموحه منج ختيه .. كان في زحمة شوي في المحل ..
ام روضه : بالحل اخويه .. شفتك اتأخرت فسرت أدور عليك وما حصلتك فقلت لابوها وعمتها يدورونها وانا يلست عند السيارة ..
حمد : عيل طمني ابوها عليها
ام روضه : ان شاء الله ..
وعقب ما سوت تلفون حق ريلها استرخصوا حمد ومانع عنها وساروا صوب سيارتهم..
وقبل لا يركب مانع حط ايده على مخباه ..
مانع : والقووووم ... نسيت تلفونيه في الكوفي شوب
حمد : الله يهدااااك .. سير ييبه شو تتريا ؟؟
وسار مانع اييب تلفونه ..
ويوم ركب حمد السياره شغلها وحط غنيه يا طارشي ويلس يسمعها وسدح السيت وغمض عينه .. ويوم فتح عينه مره ثانيه حصل ريال خاطف جدام سيارته وكان مثل ما قال مانع .. انه فيه شبه من روضه .. فسيده عرفه انها ابوها ..
وكانن السيارتين في سيد واحد بس كانن بينهن 3 سيارات وركبوا كلهم السيارة ويلسوا يتريون عمة روضه ..
وفي الوقت اللي كان حمد فيه يعدل السيت شاف وحدة متغشيه فسيده عرفها من شنطتها .. بس الغريب انها لفت صوب سيارته وكانت سيارة حمد مظلم شرات سيارة قوم روضه بالضبط يعني نيسان ابيض مظلم ..
فتحت عمة روضه الباب وركبت بدون ما تشوف اللي يالس جدام بس الحمد لله انها نا عقت الغشوة ..
عمة روضه : (( بعصبيه)) شو هالحالة .. لاعت جبدي وانا ادور رويض وآخر شيء اييبها الأخ لين عندكم .. والله حاله !!
أول ما سمع حمد هالجمله ضحك ضحكه تلفت الأنظار .. وأول ما شافته عمة روضه عورها ويهها فسيده نزلت وقالت السموحه وبندت الباب .. وعقب سارت صوب سيارتهم وأول ما ركبت سيارتهم ..
أم روضه : شو أخرج؟
وروضه من كثر ما اثرت فيها الصدمه ما رامت تقول شيء..
أم روضه : حوووه وينج .. ارمسج انا
عمة روضه : وياج
أم روضه : باين غناتي
وتمت عمة روضه تفكر طول الوقت في حمد وفي موقفها وياه ..
ويوم رد مانع وركب السياره ..
مانع : زين أن محد شله..
حمد سادح السيت وسرحان
مانع : حمد
حمد : شو بلاك
مانع : شو وين وصلت؟
حمد : آآآآآآآآه
مانع : اووووه شكلها السالفه فيها ان
حمد : لا ان ولا لعل
مانع : علينا هالسوالف يا بو شهاب
حمد : اقول
مانع : قول
حمد : طحت طيحه في هواهم يا مانع
مانع : اهااا ثرها جيه السالفه .. منو ؟
حمد : ما أعرف
مانع :من متى؟
حمد : من سبع دقايق
مانع : وشو استوى بالضبط
حمد : سير لا .. هب جني عطيتك ويه زياده عن اللزوم
حط حمد شريط مرحبا بطارش نباكم ويلس مرتبش.. ويوم وصلوا بيت خالتهم يلسوا يرمسون شوي في الحوي.. وبالصدفه كانت مهره توايج من الدريشه اللي فوق ..
مهره : ميرووه .. الحقي
ميره : شو بلاج؟
مهره : حبيب القلب وصل
ميره : ها شو؟؟ قولي والله
مهره : وحياااتج
ميره : فز قلب مياري .. وسيده سارت صوب الدريشه
ميره : أكرهك
مهره : من قلبج؟
ميره : تبين الصراحه لا
مهره : وليش تكرهينه؟
ميره : بس جيه .. بلا سبب
مهره : خلي عنج هالسالفه وتعالي بنسير نيلس في الصاله اللي تحت لان قوم اميه الحين بيون ..ونزلت ميره ومهره في الصاله اللي تحت..
ميره : مهاري .. اميه ما سوت تلفون ؟
مهره : سوت ويوم رمستها كانن توهن طالعين من الفندق
ميره : ومتى سوت
مهره : من ربع ساعه تقريبا
ميره : يعني الحين بيوون
وفجأة يصيح التلفون وشلته ميره ..
ميره : الو
..... : مرحبا
ميره : (مرتبكه) مرحبا ملايين

ظنكم من اللي متصل ؟؟
وهل بيستوي شيء في حياة حمد بيجلب حياته ؟؟

الجزء الثالث
وفجأة يصيح التلفون وشلته ميره ..
ميره : الو
مانع : مرحبا
ميره : (مرتبكه) مرحبا ملايين
مانع :شحالج ؟
ميره : يسرك الحال والله
مانع : ممكن أسأل سؤال بس بدون اي عصبيه ؟
ميره : ما في داعي تتعب عمرك .. أنا ميره
مانع : ( وهو يضحك) كنت متعمد أغيظ بج
ميره : ساكته وفي خاطرها تضحك
مانع : عيل وين خالاتيه واميه؟
ميره : بعدهن ما ين
حمد : عنبووو لين الحين .. انزين وما قالن لكن متى بيظون ؟
ميره : مهره تقول انها يوم رمستهم كانن ظاهرات من الفندق يعني أكيد انهن الحين واصلات
حمد : زين عيل .. في وداعة الله
ميره : الرب حافظ
مهره : منو هذا ؟
ميره : فارس الأحلام
وشوي ان امهن وخا لاتهن داخلات عليهن
ام راشد وام حمد وام مانع : السلام عليكم؟
ميره ومهره : وعليكم السلام و الرحمه
ميره : حي الله العيايز
ام حمد : منو العيايز ؟ جان تتطرين امج برايج
ام راشد : لا امها شباب
مهره : خلاص كله ولا زعلكن .. كلكن غرشوبات والكل يتمناكن
والكل ضحك على جملة مهاري
ام مانع : بناتي .. ما يواا قوم مانع؟؟
ميره : يواا .. بتلقينهم يالسين في الميلس
ام مانع : عيل انا بسير صوبهم
ام حمد : صبري بعق عباتيه وبيي فياج
ام مانع : يالله عيل .. وانا بعد بعق العباة
ام راشد : تجدمني انتن .. وانا بسير المطبخ بييب دلة القهوه وبيي..
وسارن موزه وعوشه صوب عيالهن في الميلس وهن لابسات الشيل السود وعاقات العبي ودخلن الميلس ..
حمد : هلا بالطش والرش .. أسفرت وأنورت .. مرحبا ملايين ولا يسدن في ذمتيه ..
ام حمد : الله يحييك غناتي
أم مانع : مانع
مانع : لبيه فديتج
أم مانع : يا الهرم
مانع : افاا .. ليش؟
أم مانع : شعنه ما تغدي شرات بو شهاب؟
مانع : في الشو؟
أم مانع : في منطوقه يعلني افدااه
مانع : حمد غير
أم مانع : في الشو غير بعد ؟
مانع : بو شهاب شاعر
وكلهم ظحكوا على هالجمله.. وشوي تدخل عليهم ام راشد
ام راشد : حيا الله باللي لفانا
حمد ومانع : الله يحييج
ويلسوا يسولفون وعقب ساعه تقريبا ..
أم حمد : يالله عيل بخليكم .. بسير أرقد
أم مانع : وأنا بعد شليني فياج
حمد : شو السالفه ؟!! أسمع طاري رقاد
مانع : ان شاء الله ناويات ترقدن هنيه ؟؟
أم مانع : إلا معزمات
أم حمد : تعرف اننا ولا جد مره يينا دبي ولا بتنا
حمد : هذاك يوم نكون كلنا يايين بس الحين حصه وعلاوي في البيت منو بييلس عندهم هناك؟
ام حمد : ما عليك انته .. غيث اخوك غيث وياهم
حمد : اميه تعرفين ان غيث ما يقر في البيت
ام حمد : شو الراي الحين ؟؟ شو تباني اسوي؟
حمد : اليوم ما شيء بيات بنرد العين
ام راشد : بس يا حمد الوقت متأخر.. ما تروم بعدك تظرب خط لين العين
مانع : انا عندي لكن شور
ام مانع : قول لا خليت منك
مانع : شو رايكن الحين نرد العين وان الله راد الاسبوع الياي بنيكم بالاربعا ونرد باليمعه..
ام مانع : شور غاوي شو رايج ام حمد ؟
ام حمد : شوركم وهداية الله
ام مانع : عيل صبروا علينا بنسير داخل بنييب قشارنا وبنييكم
ام حمد : وانتوا ركبوا السياره لين ما نيكم
حمد : ان شاء الله فديت روحج
مانع : هب تتأخرن ورانا درب
ام مانع : ان شاء الله
وعقب ما يابن قشارهن ردوا العين
..:: في بيت روضه ::..
عمة روضه يالسه في الحجره وتفكر في حمد وكانت تتخيل شكله يوم هو يالس في السياره كان عاق سفرته وعاقنها على السيت وكان شعره طالع من تحت القحفية .. وكان يذبح وكانت تتمنى ان الدنيا توقف عند هاللقطه ..
..:: في بيت حمد ::.
حمد يالس في حجرته وكان يالس جدام المنظره يسحي شعره لانه كان توه ظاهر من الحمام وكانت الساعه 2 فليل تقريبا ..
كان حمد يغني طال ليلي بصوت خفيف
وفجأة يسمع صوت دق على الباب
حمد : منوه ؟
حصه : انا حصووه
حمد : دخلي
دخلت حصه وبندت الباب وراها
حصه : علومك بو شهاب؟
حمد : ماا شيء علوم والله
حصه : وشحال عربان دبي
حمد : يسرج حالهم والله
حصه : الحمد لله
حمد : وانتي شو مسهرنج لين الحينه؟
حصه : إجازه وتباني ارقد من وقت .. لازم اتهنى في الاجازه
حمد : اهااا ونعم الراحه عيل
حصه : انزين بو شهاب ليش رديتوا أحيدكم بتباتون هناك؟
حمد : ما شاء الله ثرها العايله الكريمه كلها تدري وأنا آخر من يعلم
حصه : وهاي يبالها قول يعني .. تعرف اميه ان سارت دبي لازم تبيت عندهم ..
حمد : الله يسلمج هالمره ما باتنا لاني ما كنت متزهب للبيات .. وان الله راد الاسبوع الياي كلنا بنسير نبات هناك
حصه : حتى أنا
حمد : أكيد حتى انتي .. عيل بنخليج بروحج
حصه : يعلني ما اخلا منك يا بو شهاب
حمد : عيل وين غيث
حصه : راقد
حمد : من رقد ؟
حصه : قبل لا توون بساعه تقريبا
حمد : يعني الساعه 12 ونص
حصه : هيه
حمد : وعلاوي
حصه : فديته راقد
حمد : انزين اقول
حصه : قول
حمد : شو الثنوية وياج؟
حصه : يمشي حالها
حمد : ومنو غيرج في الثنويه هالسنه ؟
حصه : بنات خالتيه عليا
حمد : ما شاء الله يعني عندنا ثلاث ..يالله يوفجكن
حصه : آمين
حمد : حصووه
حصه : لبيه
حمد : قبظي الباب
حصه : افاا .. بس يالله مقبوله منك
حمد : وبندي الباب وراج
حصه : من عيوني لو تطلب اعيووني
ويوم ورا يوم ياي يوم الأربعاء
..:: في بيت حمد ::..
حمد نازل من الدري ويزقر امه اللي كانت في المطبخ
حمد : اميه ..
أم حمد : عونك غناتي
وسار صوب امه في المطبخ وحبها على جتفها
حمد : اقول اميه
ام حمد : قول يعلني لا خليت منك
حمد : رد علاوي من المدرسه ولا بعده ؟
ام حمد : هيه فديته توه ياي ..
حمد : وغيث؟؟
ام حمد: على قولته أول يوم بيخلص من الجامعه بيلحقنا هناك
حمد : وحصه ؟؟
ام حمد : بعدها ما يت الساعه ثنتين بيرخصونها
حمد : ومنو بيبها
ام حمد : الدريول والبشكاره..
حمد : خلاص أنا بييبها
ام حمد : زين سويت غناتي .. ابغي الدريول يقظي لي حايه
حمد : يالله عيل بسيير اييبها عقب شوي بيرخصونها
ام حمد : الله يحفظك
سار حمد صوب مدرسة حصه وكان راكب سيارته النيسان وكان منزل الدريشه لان السياره كانت صكه شوي وكان حاط غنية هاذي القصيده مني ومطوول عليها شوي .. وكانت حصه تتأكد من السياره ويوم تأكدت انها سيارة اخوها جان تسير صوبه وتركب عداله ..
حصه : مرحبا
حمد : مرحبتين
حصه : اوووه غريبه.. من وين طالعه الشمس؟؟ حمد ياي المدرسه عسب يردني البيت لا ما أصدق .. ابا اتأكد..
حمد :جان يصفعها طراق خفيف على سطارها .. ها تأكدتي ولا أزيدج؟؟
حصه : لا خلاص تأكدت
حمد : حمدي ربج انتي.. وحبي ايدج من ورا وجدام بعد ..
حصه : الحمد لله رب العالمين
حمد : ((ساكت))
حصه : اتصدق حمد البنات كلهن تينن عليك
حمد : احم احم .. اخجلتي تواضعي ..
حصه : هب تصدق عمرك عاد
حمد : يا ويلي على الغيرة
حصه : على شو يحظي
حمد : على هالاخو اللي الله انعم عليج به
حصه : خل عنك الرمسه وشوف الدرب
حمد : انزين حصوه .. ترانا عقب ما نصلي العصر سيده بنسير دبي
I am ready for that حصه : اوكيه ..
حمد : شو رديدات بعد؟
حصه : وهيه تضحك (( يعني انا جاهزه للسيره ))
حمد : الله يعينا بس
وعلى الساعه 4 العصر ظهروا قوم مانع وحد من البيت وطبعا كل واحد في سيارته مع هله.. و تقريباعلى الساعه 5 الا ربع وصلوا دبي ..
ويوم نزلوا من السياره الحريم سارن داخل الفله واما بو مانع فما ياي وياهم لان عنده ركض في سويحان يوم الخميس ونزلزا حمد ومانع القشار من السيارات وزقروا البشاكير عسل يشلن القشار ويودنه داخل الفله .. ويوم شلنه وروحن لاحظ حمد ان هناك كيسه نسى ينزلها .. جان اييبها ويسير دام الباب الرئيسي وعقب حط الكيسه عند الباب ورد صوب سيارته عسب يقفلها
ويود كان بيسر صوب السياره سمع حد يزقره من وراه
وأول ما صد وراه شاف روضه طالعه من الباب الرئيسي وتزقره بصوووت عالي وعب ركضت صوبه
نزا حمد على مستوها وفتح ايده وعقب شلها وحبها وكانت مهره توها ظاهره من المطبخ واول ما انتبهت ان حمد كان جدامها تغشت وطبعا حمد ما شافها لانه كان مشغول بروضه بس طبعا حمد ما عرفها اذا هيه ميره او مهره..
مهره : السلام عليك حمد
حمد : وعليج السلام .. شحالج ؟
مهره : يسرك الحال والله .. انته شخبارك ؟
حمد : والله ما شيء أخبار
مهره : اووه رواضي هنيه .. منو ياي وياج حبيبي
روضه : عمووووه
وهنيه فز قلب حمد
مهره : ووينها الحين
روضه : داخل بيت ويا ميلة
مهره : يالله عيل بترخص عنك الحين .. يالله روضه تعالي
روضه : ما أليد
حمد : خليها ويايه وبعيدين بييبها صوبكم
مهره : اوكيه عيل
وسارت مهره عنهم ودخلت الفله
وسار حمد صوب الميلس عند مانع وكان شال روضه
وطبعا يلس حمد يفكر في الدرب وحس بالفضول لانه ما عرف اسم عمتها
ويوم دخل حمد الميلس حصل مانع يرمس بالتلفون ومانع ما حس بهم لانه كان عاطي ظهره للباب .. ويلس حمد يلعب ويا روضه
وأول ما انتبه مانع لهم سكر التلفون وهو مصدوم
مانع : بو شهاب .. هب جنها هاي روضه
حمد : اتصدق عاد
مانع : شو يابها هنيه
حمد: علمي علمك ..
مانع : افا عليك انا بسأل ولا عليك انته بس
وشوي ان ام راشد تدخل عليهم ويقومون يسلمون عليها
حمد : شحالج خالتيه
ام راشد : يسرح حالي غناتي
مانع : وشو العلوم ؟
ام راشد : والله ما شيء من صوبنا جان الا من صوبكم انتوا
حمد : ما شيء من صوبنا طال عمرج
وانتبهت ام راشد ان روضه كانت تلعب وراهم
ام راشد : فديت روضه انا .. منو يابج غناتي
روضه : عمووووه
ام راشد : ووينها الحين
روضه : عند ميله داخل بيت
ام راشد : يا حيكم والله
مانع : اقول خالتيه من بنته روضه
ام راشد : وااااايه يا مانعع ما عرفتها؟؟
مانع : لا والله ما عرفتها
ام راشد : هاي روضه بنت خليفه ولد اخو بو راشد
حمد : بس على أساس انهم مسافرين
ام راشد الا من ثلاث ايام رادين
مانع : اللي اذكره انهم عايشين في بوظبي
ام راشد لا فديتك الحين ردوا بيتهم الاولي هذا اللي حذالنا
حمد : اهاااا
وبينما كانوا يرمسون كانت رووضه تشرب الماي جان تلعبه وتجبه على عمرها
ويوم صدت ام راشد صوبها
ام راشد : روضووه شعنه خيستي ثيابج ...يالله سيري صوب رفوع خليها تبدلج اياهن ..
وربعت روضه صوب عمتها في الفله
وهنيه ارتبش حمد واستانس لانه عرف اسمها
ام راشد : يالله عيل بخليكم .. بسير أيلس عند خواتي وبخلي بو سنيده ايي صوبكم
حمد ومانع : الرب حافظ
واتصلت ام راشد براشد اللي كان ياي في الطريج وقالتله يسير صوب عيال خالته في الميلس وييلس وياهم
وعقب فتره ظهر حمد من الميلس وكان يبغي يسير صوب سيارته عسب اييب تلفونه اللي نساه هناك ويوم كان يمشي في الحوي كانت رفيعه تشوف من دريشة المطبخ روضه وهيه تلعب بالسيكل في الحوي .. فأول ما انتبه حمد لروضه سار صوبها وشلها وحبها ويلس يكلمها شوي.. وطبعا حمد ما انتبه لرفيعه لان الدريشه كانت عاكس ..
رفيعه : ( منصدمه وفي نفس الوقت كانت تبا تعرف اسمه) أقول مهاري منو هذا اللي شال روضه؟
مهره : وسارت صوب الدريشه ( هذا حمد ولد خالتيه موزه )
رفيعه : ( منصدمه ) هذا اللي كنا نلعب وياه يوم كنا صغار
مهره : هيه
رفيعه : قولي والله
مهره : وحياتج ، ليش يعني
رفيعه : ما شيء .. وتذكرت موقفها وياه جان تبتسم
وشوي ان حصه وميره يدخلن عليهن
حصه : اووووه اشوف رفوع عندكم
رفيعه : هيه غناتي الا من العصر يايتنهم
ويسلمن على بعض
حصه : شحالج؟
رفيعه : بخير وسهاله
حصه : عساه دوم .. وشحال بوظبي بعد
رفيعه : الحمد لله حالها تمام
حصه : من متى انتوا هنيه
رفيعه : الا من ثلاث ايام
حصه : ياحيكم والله
رفيعه : الله يحييج
حصه : شو شكلكم ودرتوا بوظبي
رفيعه : هيه فديتج
حصه : يا حظج على الأقل مهاري ومياري عدالج
رفيعه : هيه والله يعلني افداهن
ميره : ونرجع لمحور حديثنا .. ليش متفيزرات عند الدريشه ؟
مهره : ما شيء
رفيعه: أقول بنات شو رايكن نرد الفله .. خلصنا شغلنا هنيه
ميره : يالله عيل
مهره : انتن سبقني وانا بيي عقب شوي
وظهرن رفيعه وميره وحصه من المطبخ وهن متغشيات ما عدا حصه
ويوم انتبهت حصه حق روضه
حصه : يالله فديت رواضي .. من زمتن ما شفتها .. بسير صوبها منو بيسير فيايه
رفيعه : لا الغلا انا هب سايره بترياكن هنيه
ميره : انا بسير وياج بسلم على حمد وبييب رواضي
وسارن حصه وميره صوب حمد وروضه ..
أول ما وصلت حصه هناك شلت روضه ويلست تتفداها
ميره : شحالك حمد ؟
حمد : تمام والله .. انتي شخبارج ؟
ميره : بخير الحمد لله
حمد : عساه دوم
وانتبه حمد لرفيعه اللي كانت واقفه عند المطبخ فابتسم لها واول ما شافته رفيعه تذكرت موقفها معاه ونزلت راسها
حصه : اقول بو شهاب متى بيي غيث
حمد : عقب ما يخلص دوامه بيي
حصه : اهاا
حمد : عيل وين علاوي عنكم
حصه : أحيده يلعب ويا مايد بالسياير عند الزراعه
حمد : توالفوا .. الله يعينا بعونته
ميره : الله يعينا على حشرتهم فليل
حصه : عادي الا هم مايد وعلي يعلني هب بلياهم
حمد : هه الغاليه لو هم ييلسون عندكم ..المصيبه انهم ييلسون عندنا
حصه : حتى رواضي تيلس عندنا
حمد : س روضه فديتها هاديه
ميره : عيل بعدك ما عرفتها عدل
حمد : دام انها جيه السالفه .. مره ما ابغي اعرفها
ميره : بتفتك من الصدعه
حصه : يالله عيل بنسير الحين
وسارن حصه وميه وروضه صوب رفيعه وعقب صدت روضه صوب حمد وتسوي بيباي له
سار حمد صوب سيارته ويوم ركبها شل تلفونه وبعدين تنهد وحط راسه علىالكرسي..
شو ظنكم بيستوي ؟؟

الجزء الرابع
وبعدين نزل من السيارة وسار صوب الميلس وعقب صلاة العشا يلسوا قوم حمد ومانع وراشد وبو راشد في الحوي وكانوا مايد وعلاوي يلعبون بالسياكل وكانوا مسوين حشره ..وشوي انهم يسمعون صوت سيارة عند الباب .. وكانت هاذي السيارة سيارة غيث واول ما دخل البيت شافه مايد جان يربع صوبه وسلم عليه ، شل غيث مايد وساروا صوب الرياييل وقاموا وسلموا عليه ويلسوا يسولفون ..
..:: داخل الفلة ::..
مهرة وميره وحصة ورفيعه يالسات في الحجرة اللي فوق وامهاتهن يالسات في الصالة اللي تحت.. وكانت روضه يالسة وياههن في الحجرة وكانت لابسة الشيلة السودة وشالة الشنطة في ايدها وكانت لابسة الكعب .. وتوها كانت بتظهر من الحجرة ..
رفيعه : حوه .. رواضي ، على وين؟
روضه : بتيل اتلم على عموووه عليا
رفيعه : اها ، سيري بس لا تظهرين برع
ويوم ظهرت روضه ...
ميره : بنات شو رايكن نقنع الأهل ؟
رفيعه : بشوو؟
ميره : اننا نسير المزرعه باجر ونبات هناك
مهره : فكرة حلوة
حصه : زين والله .. من زمان ما سرنا رباعه
رفيعه : ذكرتيني بأيام قبل
مهره : هيه والله ..الله يعودهن علينا ان شاء الله
حصه : يالله عيل خلونا نسير صوب العيايز ..
رفيعه : تعااالوا ، على طاري العيايز وين يدي؟
ميره : الله يسلمج من العصر وهوه في العزبه .. على قولته عنده شغله ، بتلقينه ياي الحين
رفيعه : واااااااااايه فديته ما يصبر عن حلاله
مهره : إلا تعيبج سوالفه يعلني أفدااااااه
حصه : يالله عيل خلنا نلحق نرمسهم عسب يتزهبون
وسارن مهره وميره وحصه ويوم وصلوا عند الباب انتبهوا ان رفيعه هب وياهم .. وردن يزقرنها
ميره : رفوع جيه الغالي ؟؟ تترين عزيمه
رفيعه : على شو؟
ميره : اونج ما تعرفين
رفيعه : وانا شو يخصني ؟
مهره : ويدي ، جيه الشيخه ما تبين تروحين ويانا؟
رفيعه : والله ودي اليوم قبل باجر .. بس أخاف ان اميه وابويه ما يرضون
ميره : ما عليج انتي خليهم علينا
حصه : والحين يالله كلكن جدامي
وعقب طلعة روح العيايز وافقن لان كل وحده منهن تعلثت بحلالها .. وعقب سوت ام راشد تلفون حق بو راشد عسب تتخبره .. ووافق بو راشد على السيرة ..
ميره : حرمة عمي .. طلبناااااج قولي تم
مهره : فديتج الشيخه لا تردينا
ام رفيعه : انتن قولن بالاول وان الله راد ما بردكن
ميره : نبغي رفوع تروح ويانا المزرعه
رفيعه : دخيلج يا اميه
ام رفيعه : والله يا بناتي الشور هب عندي .. شورها عند عمكن ولا انا مره ما بردها عنكن..
مهره : تسلمين غناتي .. ولا عمي خليه علينا
وردن فوووق
وأول ما دخلن الحجرة ظحكن من الخاطر.. كانت روضه يالسه جدام المنظره وقابظه في ايدها الجحال وكانت مشخطه ويهها به ..
رفيعه : غربلات عدووج ... رويض انتي متى غافلتينا وركبتي فوق؟؟
ويلسن البنات يظحكن عليها .. شلت رفيعه روضه وودتها الحمام وغسلت ويهها ويوم كانت رفيعه تمش ويه روضه بالفوده ..
حصه : رفووووع
رفيعه : عونها
حصه : شو رايج تباتين فيانا اليوم؟
رفيعه : اممممم بفكر
ميره : ويا هالراااااس وهاي يبالها تفكير بعد
مهره : صدقهن والله (( وتفر عليها كرتون الكلينكس ))
رفيعه : اممم .. انا بمشي على شور روضه ان قالت هيه ببات وان قالت لا وكان الله غفورا رحيما
حصه : رفوع .. ورواضي شو فهمها؟
مهره : ما عليه خليها على هواها .. يالله رفوع اسأليها
رفيعه : رويض تبيني ارقد عندهم اليوم ولا لا؟
روضه : لا
ميره : (( وهيه تضحك )) هب حولج
حصه : خيرها فغيرها
رفيعه : وعااااااااد انا اموووووت في شيء اسمه عناد .. وإلا اليوم أتم عله على قلوبكن وببات عندكم ..
مهره : تعيش بنت سالم تعيش
حصه : فالتحيااااااااا رفوع
ميره : الحمد لله والشكر ولا الإنتخابات
..:: عند الشباب ::..
راشد : بو شهاب
حمد : عونك بو سنيده
راشد : طلبتك قول تم
مانع : جني عرفت طلبك
غيث : وأنا بعد عرفته
بو راشد : بلاكم تتناغزون بالرمسه
راشد : بلّول يقول بو شهاب تم
حمد : تم
راشد : ابغيك تشل علينا شله
غيث : والله يا اني دريت ان هذا طلبك
حمد : إلا هذا طلبك .. حاظرين بو سنيده ..
وفي نفس الوقت كانت الدريشه مالت الحجرة اللي فوق مفتوحه
حمد : (( ما لوم عيني تسهرعليك .. وأحلمك في غمظة عيوني.. طبعك حلو ميت أنا فيك.. واللي شراتك من يكوني .. محلاك لاكن من يساويك .. انت الذي ساكن عيوني .. أغليك يا المحبوب أغليك .. غصبن على ناس اعذلوني .. لو ذقت منك هجر بعطيك .. حب وغلا وأحلا شجوني .. لا تظن يالمحبوب ناسيك .. لا تظن حبك لي يهوني )) .. وفي نفس الوقت كانن البنات يسولفن وفجأة سكتن يوم سمعن صوت حمد..
حصه : واااااااااايه فديت بو شهاب
مهره : ما شاء الله عليه صوته فنان
ميره : الله يوفجه
ورفيعه كانت سرحانه في شلة حمد ولا تدريبهم ..
..:: عند الشباب ::..
راشد : من قال سالم
مانع : صح لسانك الشاعر
غيث : تسلم يا بو شهاب
حمد : الله يسلمكم
بو راشد : ليت ابوك ما غاب .. جان افتخر ان عنده ولد شراتك يا بو شهاب
حمد : الله يرحمه ويغمد روحه الينه
غيث ومانع وراشد : آمين
وفجأة يسمع حمد صوت روضه من وراه .. ويوم صد وراه شاف روضه تربع صوبه .. جان ييلسها عداله وكان يلعبها .. وكانت تضحك بصوت عالي
رفيعه : غربلات العدو وين رويض؟
مهره : جني اسمعها برع في الحوي
رفيعه : يالله مقوى هالبنت قايلتلها ما تظهر خاري ..
حصه : ما عليها شر الا يالسه ويا عمها برع
رفيعه : ما عليه ما بتكمل خمس دقايق والا بتشوفينها يايه تصيح
ميره : وشو يصيحها
رفيعه : ومنو غير ميوود
مهره : عااد ها الشيء اظمنه لج
رفيعه : الحين خلونا من سالفة رويضه .. والحين أي مزرعه قررتوا اتسيرون؟
مهره : شو رايكم نسير مزرعتنا اللي في الذيد .. ابويه يقول أن الجو فنان هناك ومن كمن يوم طايح فيها مطر..
حصه : الله يعينا على البرد عيل .. وخصة اننا في الشتا ، اسميه المرض بيضوي ..
ميره : أحسن عسب أمرض وما اسير المدرسه
رفيعه : هيه لازم تبيها من الله ..
ويلسوا يظحكون ..
..:: عند الشباب ::..
حمد : رواضي حبيبي .. تعرفين تغنين طال ليلي ؟
روضه : ( هزت راسها على انها تعرف )
حمد : يالله عيل قوليلنا اياها
روضه : سااااااكتة
حمد : انا ما قلتيلي ما بوديج الدكان ولا بشتريلج حلاوة
روضه : انا ابا حلاوة
حمد : أول قولي وعقب بوديج انتي وعلاوي وميود الدكان..
غيث : لا انا بقول
روضه : لا انا بقول
حمد : يالله عيل
روضه : ( تال ليلي من تأليلي من تدافي خلي الغالي ، باتوا ابوعي مداهيلي والخلي من ليأتي خالي )
حمد : فديتج انا ويحبها على راسها
روضه : يالله نتيل الدكان
حمد : يالله سيري ازقري علاوي وميود من الميلس والبسوا نعولكم و تعالوا ..
وسارت روضه تزقرهم ..
وشوي ان يد راشد يدخل البيت ، جان يسير صوبهم
يد راشد : مرحبا الساع والله
ويقومن حمد و غيث ومانع ويسلمون عليه ويحبوبه على راسه ..
يد راشد : يا حيبه
غيث ومانع وحمد : الله يحييك
وشوي أن روضه وعلاوي وميود يايين
مانع : خلاص بس هالمره
يد راشد : والله ين يبته يا حمد يا اغسل شراعك انته وهالهرم منووع
حمد : على هالخشم طال عمرك
مانع : لا حوووول .. خلاص عصير برتقال يمشي حاله
يد راشد : لا ما شيء .. عنبو تخسر بيزاتك على شيء ما يرزى يا مسود الويه..
مانع : عيل !!
يد راشد : الحين بخليهم يسوولك واحد فرش ..
غيث : اوووه .. اوووه ، علموه الشيبه فرش بعد .. من قدك
راشد : هيه بعد ما نرومله اونه قد مورنق والله حاله
يد راشد : بتسكتون ولا اغسلكم بهالعصا اللي عندي
غيث : لا خلاص كله ولا عصاتك .. ذايقين المر منها..
حمد : (يضحك ) يالله عيل تامرون بشيء
كلهم : سلامتك
وسار حمد الدكان وشل وياه علاوي وروضه ومايد
يد راشد : بو سنيده عيل وين ابوك؟
راشد : ما ادله والله الا قبل شوي ساير .. الحين بيرد
..:: عند البنات ::..
رفيعه : اقول بنات ظنكن ان قلت لليازيه اني اشل بنتها بتوافج؟؟
مهره : ان الله راد بتوافج
ميره : فديت رواضي ما نروم نستغني عنها
حصه : ما عليج ان شاء الله بتوافج
وشوي يسكتن..
حصه : رفوع .. شحال الكليه وياج ؟؟
رفيعه : تمام الحمد لله .. نقلت من بوظبي لين كلية دبي
مهره : زين والله
وشوي أن البشكاره تدخل عليهن
البشكاره : ( توجه كلامها لرفوع ) ما ما يريد انتي تحت
رفيعه : اوكيه قوليلها الحين بيي.. وانتي ظاهره برع هاتي روضه وياج ..
البشكاره : روضه ما في داخل بيت
رفيعه : (( مستقطعه )) عيل وين سارت غرلات العدو أخاف انها طلعت برع البيت ..
وشوي أن روضه تدخل عليهم وفي ايدها كيسه ممزوره حلاوه ..
مهره : هاذي ما عليها شر
رفيعه : رواضي وين روحتي ؟؟
روضه : سرت الدكان ويا ألاوي و ميود..
رفيعه : ومنو مودنكم؟؟
روضه : أمد
حصه : ياحيكم والله ..
رفيعه : يالله عيل بويه عنكم ..بسير البيت بقنع اليازيه وبقول حق اميه انني ببات عندكم ..
ميره : في حفظ الله
وسارت رفيعه ويا امها وروضه بيتهم وهيه في الطريج خبرت أمها انها بتبات عن قوم قمها فوافقت . وأول ما دخلت رفيعه حجرتها فتحت كبتها وجهزت ثيابها حق الكشته وفجأة خلت اللي في ايدها وتيلس على السرير
لانها كانت شاكه ان ابوها ما بيوافج على سيرتهابروحها الكشته بدون اهلها وفجأه يصيح التلفون اللي في الصاله وسارت رفيعه تشله ..
رفيعه : ألو
ميره : مرحبا
رفيعه : مرحبا ملايين
ميره : عندي لج خبر مب حلو
رفيعه : أكيد أبويه ما وافق
ميره : يلسنا أنا ومهره نحايله لاكن مافي فايده ..
رفيعه : اتصدقين كنت حاسه ..
ميره : وشو الحل الحين ؟
رفيعه : اليلسه في البيت أحسن حل .. وخيرها فغيرها
ميره :الصراااااااااااحه ما توقعت أن عمي عنيد لهالدرجه .. وأقول هالعناد اللي فيج من وين يايبتنه؟
رفيعه : يالله خليها على الله
ميره : أوكيه عيل بخليج
رفيعه : أوكيه وسلمي على البنات
ميره : سلامن يبلغ
رفيعه : مع السلامه
ميره : اووه صبري .. نسيت أقولج شيء
رفيعه : واللي هو؟؟
ميره : صادووه
رفيعه : شو قصدج؟
ميره : يعني كل اللي قلته لج كان مجرد مقلب وان عمي اللي هوه ابوج وافق تروحين ويانا ..
رفيعه : ويا ويهج
ميره : ((وهي تضحك )) واحد.. صفر
رفيعه : وعقب شوي بتستوي واحد .. واحد
ميره : كيف يعني؟
رفيعه : ما شيء بس عقب شوي بتعرفين
ميره : بنشوف
رفيعه : اوكيه
ميره : انزين بتخبرج .. رمستي اليازيه؟!
رفيعه : لا الحين بسير
ميره : أوكيه عيل بخليج
رفيعه :الرب حافظ
ميره : في وداعة الله
أول ما بندت رفيعه التلفون كملت تزهيب ثيابها وعقب ما خلصت سارت عند ام روضه اليازيه .. ويوم دخلت الحجرة حصلتها تلبس روضه ..
رفيعه : السلام عليكم
اليازيه : وعليكم السلام والرحمه
رفيعه : شو تسوين؟
اليازيه : مثل ما تشوفين يالسه ألبس روضه
رفيعه : اها
اليازيه : شو السالفه ؟
رفيعه : أي سالفه ؟
اليازيه : من ييتي دبي ما قمنا نشوفج
رفيعه : الله يسلمج لأن في بوظبي محد كان عندي أما الحين بنات عمي عندي يعلني ما أخلا منهن
اليازيه : ونحن ؟؟
رفيعه : وانتوا بعد الله لا يحرمني منكم
اليازيه : تسلمين غناتي
رفيعه : أقول اليازيه
اليازيه : عونها
رفيعه : ممكن أطلب طلب بس يا ليت ما ترديني
اليازيه : ان الله راد ما بردج
رفيعه : انزين سمعي السالفه .. إن الله راد باجر بسير ويا قوم عمي ثاني المزرعه ..
اليازيه : يا حيكم ..
رفيعه : والمطلووب انج توافجين على اني أشل رواضي ويايه
اليازيه : لا غناتي ما تروميلها .. رويض روحها عباله
رفيعه : لا عباله ولا شيء أقوولج
رفيعه : أنا بيودها وبأكلها وكل شىء بس دخيلج وافقي ..
اليازيه : والله لو ما اني واثقه فيج جان ما خليتها تسير .. بس الشيمه شوفيها عدل ..
رفيعه : من عيوني الشيخه
اليازيه : عيل ازقريلي البشكاره قبل لا ترقد عسب تزهب قشار روضه
رفيعه : اوكيه .. الحين بروح عند قوم عمي ثاني وباجر الصبح بسويلج تلفون عسب اتطرشين رواضي وقشاري..
روضه : انا بتيل وياج
رفيعه : لا حبيبي باجر الصبح تعالي
اليازيه : وبتباتين عندهم اليوم
رفيعه : هيه
اليازيه : ووين حاطه قشارج؟
رفيعه : عدال الكبت في الكيسه العنابيه
اليازيه : اوكيه
رفيعه : يالله عيل تصبحين على خير
اليازيه : وانتي من أهل
وسارت رفيعه صوب بيت عمها .. وقبل لا تدخل شافت نيسان حمد موقفه على الباب .. خطفت عدالها ووقفت عندها ولمستها بإيدها وعقب كملت طريجها ويوم دخلت خافت انها تحصل الشباب يالسين في الحوي .. بس الحمد لله أن محد كان يالس .. وكانوا كلهم يالسين في الميلس ويوم وصلت رفيعه نص الحوي طلع حمد من الميلس وكان ساير صوب سيارته وانتبه حمد لرفيعه بس رفيعه ما عرفت انه حمد لانها ما صدت وراها .. وكمل حمد طريجه وكملت رفيعه طريجها .. دخلت رفيعه الفله وركبت فوق ودخلت حجرة البنات .. ويوم دخلت حصلت مهره وحصه طايحات على السرير يسولفن ..
رفيعه : هلا بنات
مهره : أهلين
رفيعه : عيل وين العيايز مالهن شوف في الصاله التحتيه؟
مهره : اميه رقدت في حجرتها وخالاتيه رقدن في الحجرة النصفانيه..
رفيعه: وميرووووه ؟
حصه : تتسبح
رفيعه : (( بنبرة مكر )) أهااا..
وشوي أن رفوع تظهر من الحجرة وترد عقب دقيقتين وفي ايدها كوب ماي بارد..
مهره : رفوع ترا الماي اللي في ايديد بييبلج العوق
رفيعه : ومنو قالج اني بشربه؟؟
حصه : عيل
رفيعه : بتعرفن عقب شوي
مهره : الله يعينا
رفيعه : ومتى بتظهر مياري؟
مهره : أكيد الحين لانها من فتره داشه
سارت رفيعه ووقفت عدال باب الحمام .. وعقب 3 دقايق تقريبا فتحت ميره الباب فسيده رشت رفيعه عليها الماي .. وأول ما انرشت ميره شهقت من الخاطر وتمن البنات يظحكن عليها..
رفيعه : واحد واحد غناتي
ميره : الله ينطبج .. قلنا انتقام بس مب جيه ويا راسج
رفيعه : المهم اني رديت مقلبج
ميره : اوكيه مردووده ان شاء الله
رفيعه : بنشوف
ويلسن كلهم يسولفن .. وعقب رقدن كلهن ما عدا رفيعه .. يلست تتذكر يوم تلمس سياره حمد وتتذكر سالفتها معاه .. وعقب رقدت

الجزء الخامس
وعلى الساعه خمس الفير دخلت أم راشد عليهن ووعتهن حق صلاة الفير والشباب كلهم ساروا المسيد .. وعقب ما صلن سارن المطبخ عسب يفزعن لامهاتهن في المطبخ..
..::وفي المطبخ::..
أم راشد : مهره غناتي
مهره : عونج الشيخه
أم راشد : سيري انتي ووحده من خواتج وفرشن الحصير في الحوي وتعالن عقب ما تخلصن عسب أعطيكن كوار الضو وتحطنه هناك لان الدنيا ما تتلاغى برع..
مهره : من عيوني
رفيعه : أنا بسير وياج ..
مهره : يالله عيل قبل لا ايوون من المسيد
وسارن مهره ورفيعه وفرشن الحصير برع وردن المطبخ عسب اييبن الكوار وسارت رفيعه وشلت الكوار وحطته على الحصير ويوم توها بتقوم الشباب كانوا توهم رادين من المسيد .. أول ما شافتهم رفيعه سيدة تغشت و ردت المطبخ هنيه حمد تيبس محله .. يحقله والله لان رفيعه ما شاء الله عليها عليها جسم فنان يعني لا هيه بمتينة ولا هيه بضعيفه ولا هيه بقصيرة ولا هيه بطويله يعني نص نص .. وبشرتها بيضا و أحلى ما فيها ابتسامتها لان غمازيتها محليتنها وخدودها طبيعيات فيهن شوية احمرار وعيونها بنيه غامجه .. وثمها صغير وحلو وشعرها ما شاء الله يوصل لين ركبها ولونه اسود مايل للبني.. ما شاء الله عليها جميله بمعنى الكلمة وطبعا حمد ما شاف ويهها.. وهو ما شافها من يوم كانوا صغار يعني نسى ملامح ويهها بس كان يذكر ابتسامتها وغمازيتها .. وعقب ما خلصن الحريم من تجهيز الريوق طرشنه ويا البشكاره صوب الرياييل .. وسارن الحريم الفلة عسب يتريقن
وعلى الريوق..
أم راشد : أقول بناتي ترانا الساعه سبع سارحين
ميره : يعني عقب ساعة
مهره : ان شاء الله .. نحن جاهزين
وعقب ما خلصن البنات من الريوق سارن الحجرة اللي فوق .
ميره : يالله خلنا ننزل القشار تحت عسب يحملونهن في السيارة
رفيعه : أنا بسوي تلفون حق اليازيه وبقولها تطرش روضه والقشار
مهره : اوكيه نحن بننزلقشارنا تحت وبنرد عسب نتجهز
شلن مهره وميره وحصه القشار ونزلنه تحت وسارت رفيعه الصاله اللي فوق وسوت تلفون حق اليازيه وقالتلها تطرش روضه والقشار
..::عند الشباب::..
راشد : شو الحين.. في كمن سيارة بتروحون فيها
بو راشد : والله ما أدلكم
مانع : أربع سيايير
حمد : شو أربع سياير وايد .. 3 سيايير يسدن
غيث : أنا عندي لكم شور .. بنسير في ثلاث سيايير، سيارتيه وسيارة حمد وسيارة راشد ..
راشد : سيارتيه فيها علة ما اضني بتتحمل وعرة اليبال..
مانع : ما عليه خذ سيارتيه
غيث : خلاص عيل راشد خذ انته سياره مانع ..المهم الحين ، أنا ومانع و يديه محمد والقشار في سيارتيه .. والعيايز كلهن في سيارة حمد وعلاوي واخته حصة .. وفي سيارة مانع بيركب راشد وميود وعمي ثاني والبنات ..
يد راشد : خلاص عيل توكلنا على الله
وفجأة يسمعون صوت حد يفتح الباب ويوم صدوا صوبه كانت البشكارة ميوده روضه وفي ايدها الثانية القشار .. أول ما شافها حمد فتح ايده لها.. ربعت صوبه ويلست على ثبانه والبشكاره سارت داخل الفله ..
حمد : رويضه بتسيرين فيانا
روضه : هيه
حمد : فديتج انا .. أصلا السيرة بلياج ما تسوى شيء
وشوي أن مايد يطلع من الفلة ووهو متلبس وجاهز وأول ما شاف روضه يالسة على ثبان حمد ربع صوبها ومط شعرها وتمت روضه تصيح ..
راشد : ميووووود يالهرم .. ليش تضربها؟؟
مايد : كيبي .. ما أهبها
راشد : دخيلك بس .. يعني هيه اللي ميته فيك الحين ..
هزب راشد مايد .. ومايد ما يود عمره وسار صوب يده وتم يصيح
يد راشد : ياللي ما تستحون ولا تخيلون جيه تضربون شيخكم؟
راشد : الهرم ظارب روضه بلا سبب
يد راشد : عااااااد اللي يسمعكم الحين يقول مره ما سويتوا شيء .. ما أدري منو كان يتظارب ويا بناتنا يوم هن صغار بليا سبب ..
وهنيه كل الشباب يسكتون يوم عرفوا عمارهم .. ويرد راشد يرمس
راشد : بس نحن كنّا ننضرب بعصاتك بس ما نقول شيء مب هاللي عندك الا من الهزبه صااح ..
يد راشد : يحقله فديته .. كله ولا مايد بن ثاني
بو راشد : ابويه تراك بتخرب الولد
يد راشد : برايه انتوا شو عليكم..
حمد : مستحيل رواضي ومايد ييلسون في سياره وحده .. أنا بركب روضه عندي وخلوا مايد عندكم في سيارة راشد ..
بو راشد : يالله عيل روحنا الساعه جريب السبع
مانع : يالله
بو راشد : راشد .. سو لأمك تلفون وخلها تظهر هيه والحرمات
راشد : ان شاء الله..
نشوا كل الرياييل وكل واحد منهم ساير صوب سيارته
وسوى راشد تلفون حق امه وقالها يظهرن برع .. وشل حمد روضه وشاف في طريجه بشكارة قوم رفيعه ..
حمد : سيري عند ماما رفيعه وقوليلها روضه بتسير فيا حمد..
سارت البشكارة عند رفيعه وقالتلها..
رفيعه : ريتا وين روضه ؟؟
البشكاره : عند بابا حمد..
رفيعه : سيري هاتيها
البشكاره : بابا حمد كلام روضه سيري سيم سيم هوّه ..
رفيعه : يالله تغربلتي جنج خربتي رمستنا .. خلاص يالله ردي البيت
سارن الحرمات وركبت كل وحده منهن السياره اللي بتروح فيها .. وسرحوا صوب المزرعه ...
وأول ما وصلوا المزرعه سارن الحريم البيت .. والبيت أرضي يتكون من ثلاث حجر ومطبخ وصاله حريم لها بابيين باب يودي للحجر والباب الثاني يودي على الممر ومجابلنه ميلس الرياييل وله بعد بابيين باب يودي برع والثاني بعد على الممر..
وعقب ما نزّلوا الشباب القشار يلسوا على الحصير.. وشوي أن أم حمد تزقر ولدها حمد .. وسار حمد صوب أمه ..
أم حمد : غناتي يوّد الغسول ودلة القهوة وودهن صوب الرياييل وان احتيتوا شيء سير المطبخ بتحصله هناك..
حمد : هب عدلة أدش يا اميه والبنات داخل
أم حمد : يالله فديت مذهبك يالغالي .. ما عليك انته محد بيتم هنيه كلنا بنسير المزرعة وبنحوط فيها ...
حمد : إنزين عيل
ورد حمد عند الرياييل ..
..::عند البنات::..
رفوع طايحه على السرير .. وحصة عدالها
ميره : بلاكن طايحات على السرير .. يالله انقفظن بنسير المزرعه
حصه : يالله رفوع
رفيعه : السموحه منكن والله .. شوي ظاربني عوار في راسي من السيارة انتن سيرن وانا ان آنست عمري بخير بلحقكن ..
ميره : تبيني أيلس وياج؟
رفيعه : لا غناتي ما يحتاي
ميره : لا عادي والله .. أقول حصوص سيري صوب العيايز وقوليلهن اننا بنيلس وبعدين بنلحقهن ..
رفيعه : ميروه والله ما في داعي تيلسين
ميرة : متأكده؟؟
رفيعه : هيه
سارت ميرة صوب شنطة امها وظهرت حبة بندول و عطتها حق رفوع ..
ميره : يالله عيل حصوه قمنا نروح
وروحن الحريم المزرعة وتمت رفيعة بروحها في البيت
.:: عند الشباب ::..
يد راشد : أسميهن الحرمات ما عيّنن خير يوم انهن روحت ولا حطن لنا كمن سحيحه..
بو راشد : راشد
راشد : نعم
بو راشد : قوم ولديه وهات السح من داخل
حمد : (يقوم ويضغط على جتف راشد) خل عنك الغالي أنا بسير عنك
راشد : تسلم بو شهاب
وسار حمد ميلس الرياييل وفتح الباب اللي يودي على الممر ويوم مشى في الممر وساير صوب المطبخ و كان باب صالة الحريم مفتوح وكانت رفيعه يالسة على الغنفة اللي عدال الباب وحاطة الشيله على جتفها ورابطه شعرها ومنزلة قصتها الطويلة على ويهها وكانت تقرا المجلة اللي اشترتها مهره من محطة البترول .. وهنيه ما عرف حمد شو يسوي.. يكمل طريقه أو انه يرد .. ومنيه كان حاس حمد بفضووووووول لانه يبغي يعرف منو هاذي .. رد حمد عند باب الممر وتحنحن بصوت عالي .. وأول ما سمعته رفيعه لبست شيلتها بسرعة وربعت الحجرة بدون ما تعرف ان اللي تحنحن هوه حمد.. كمل حمد طريجه ورد مره ثانيه ويلس عند الشباب ..
ظنكم شو بيستوي الحين؟؟
وكيف بيعرف حمد أن رفيعه هيه نفسها اللي في الصاله ؟؟


الجزء السادس
و يوم توه بييلس صاح تلفونه وكان ربيعه سالم مسوله تلفون ... سار حمد عنهم شوي ويلس يرمس سالم وأول ما خلص رد وفي طريجه صوب الشباب شاف روضه تربع صوبه .. شلها حمد ويلسها على مدعمية سيارته وقبض ايدها ..
حمد : رواضي .. منو سار فياكم المزرعه؟
روضه : عموه أليا((عليا)) وعموه أوته ((عوشه)) وعموه موده ((موزه)) وميله ((ميره)) ومهره وأته ((حصه)) ، اوووو
حمد : رفيعه
روضه : لا ألاوي وميود
حمد : ورفيعه ؟؟؟
روضه : لا عموه لبيعه ما تالت
هنيه تأكد حمد ان اللي شافها في الصاله هيه نفسها رفيعه .. وبعدين ردوا ويلسوا عند الرياييل ..
وخطف الوقت .. وقبل المغرب
..::عند البنات::..
الحرمات يالسات في الصاله ووياهن مهره وحصه يشوفن التلفزيون.. ورفيعه ومهره يالسات في الحجره.. وكانت ميره تسحي شعرها جدام المنظره وكانت رفيعه يالسه على السرير..
ميره : رفوع .. شو راسج الحين؟
رفيعه : الحمد لله تمام
ميره :ليتج كنتي ويانا
رفيعه : ليش؟
ميره : سرنا أنا ومهاري صوب الحوض اللي في نص المزرعه وجيه ما نشوفلج ذاك الضفدع
رفيعه : اوووه .. وشو سوت مهره أحيدها تبغضه؟
ميره : بس صارخت وربعت صوب العيايز وهيه مستقطعه
رفيعه : هههههههه .. أحيد يوم ان مانع وغيث يزخونه ويروغونها به
ميره : هيه والله ..
وفجأة تفتح مهره الباب عليهم
مهره : تعالن بسرعة
رفيعه : بسم الله شو استوى ؟!
ميره : شو السالفه ؟؟
مهره : غنية طال ليلي على التلفزيون
ويفزن ميره ورفيعه من مكانهن ويترابعن صوب الصاله
وفي نفس الوقت كانت أم حمد ترمس ولدها حمد في التلفون ..
رفيعه : سلامي عليك يا ميحد
وأول ما سمع حمد صوت رفيعه سكت وما انتبه لرمسة امه ..
ميره : يا ويل حالي انا
مهره : أسميه ميحد ابدع فيها
أم مانع : ولا البنت ما اغواها .. رحيمه
ام راشد : صدقج والله .. مزيونه
ميره : واايه فديت الياهل انا ..
حصه : هذا راشد بن مزيود .. ماشاء الله عليه
رفيعه : يالله .. اناااااااا موتي على اليواله
أول ما سمع حمد هالجمله رد يرمس امه
حمد : أقول اميه ليش ما تن انتي وخالاتيه برع وتيلسن فيانا ..
ام حمد : ان شاء الله الحين بني..
وسارن الحرمات برع وعقب ما غلصت الغنيه ردن البنات الحجره .. وأول ما دخلن الحجره سارت رفيعه جدام المنظره تعدل قصتها وسارت ميره عند الدريشه وفتحتها ويلست تشوف الجو .. والصراحه كان الجو فنان ومغّيم .. وسارن مهره وحصه و يلسن على الارض يقرن جرايد اليوم
وصدت ميره صوبهن..
ميره : في حياتي ما شفت حد يقرا أخبار بايته شراتكن ..
وردت تصد صوب الدريشه وفي نفس الوقت قام حمد وسار صوب سيارته وشغل غنيه يا طارشي وطول على الآخر وطلع الكلاشن مالته ويلس ايّول جدام اللي يالسين وكان قاصد يطول عليه عسب تنتبهله رفيعه واتشوفه وهو ايّول .. صدت ميره لمصدر الصوت وانتبهت لحمد وهو ايّول ..
ميره : تلاحقن يا بنات .. بسرعه
مهره : بلاج ؟؟
رفيعه : شو السالفه ؟
ميره : تلاحقن على بو شهاب وهو ايّول..
وأول ما سمعت رفيعه هالجمله خلت كل اللي في ايدها ولبست شيلتها وسارت صوب الدريشه وسارن مهره وحصه وياها..
ميره : تعالن صوب دريشة الصاله سيدة مجابلتنهم..
ويربعن البنات هناك وبما أن الوقت نهار فالدريشه كانت عاكس .. يعني البنات يشوفون اللي برع واللي برع ما يشوفونهن ... وشوي أن غيث ومانع وراشد يقومون ويشلون عصّّي من السيارة ويلسوا ايّولون ويا حمد .. وسوّوا سطر واحد ونزلوا تحت ويبسّوا .. وهنيه البنات تخبلن على هاذي الحركه وخصوصا رفيعه .. لأن حمد كان أحلاهم وأحلى شيء فيه طوله وعرض عضامه وهيبة مشيته .. وكان حمد لابس كندوره عنابيه وغتره على نفس لون الكندوره .. وحمد أكبر عن رفيعه بسنة يعني عمره20 سنة ..
والوحيدين اللي على سنّات رفيعه هم راشد وغيث .. ورفيعه تعتبر راشد كأخوها وحتى انها ما تتغشى منه .. ومانع أصغر من حمد 4 شهور بس من هم صغار وهو ويا بعض ووايد متعلقين ببعض ...
ويلسوا الشباب مرتبشين باليواله .. وشوي أن حمد ينزل وييبس وغترته ما كانت مظبوطه عدل ويوم يبّس طاحت غترته على الأرض وما شاء لله على شعره لايق وايد مع وسامته .. وشعره طويل شوي وفيه نعومه وبين ماكان ايبس كان شعره يرد على ويهه ويلس ايّول بلا غتره .. (آه عنلاتك يا حمد .. ما تعرف انك تذبحني بحركاتك ؟!) .. رفيعه فخاطرها ..
ويلس (محمد) يد راشد مرتبش ويا الشبيّبه ويلس ايّول بعصاته وهو يالس.. ومر الوقت وهم مرتبشين .. وعقب صلاة المغرب سار حمد صوب سيارته عسب اييب تلفونه اللي نساه في السياره قبل لا ايّول .. ويوم ركب السياره الا بروضه يايه صوبه وكانت تحاول تفج الباب بس ما رامت شلها حمد ويلسها على ثبانه ويوم فتح سدته عسب يظهر لروضه لبانة انجذبت روضه لعطر الفهرنهايت ماله شلته روضه ..
روضه : أنا أليد أتيل .. ( كان شكل الغرشه يشبه غرشة العصير)
حمد : هههه لا غناتي هذا مب عصير هذا عطر
وفج حمد غطاة العطر وعطّر به روضه وعقب نزلوا من السياره .. وسار حمد صووووب الرياييل وسارت روضه عند عمتها ..
رفيعه كانت تدور روضه في البيت ويوم دشت روضه
رفيعه : رويضه .. وين سرتي وانا أدورج يالله تعالي بلبسج بجامتج .. وسارت روضه ويا رفيعه عسب تلبّسها ... أول ما يلست رفيعه عسب تلبس روضه شمت ريحة العطر لانه ريحته وايد قويه ..
رفيعه : رويضه منو معطرنج ؟؟
روضه : (وهيه تحك عيونها) أمد..
أول ما عرفت رفيعه أن العطر اللي متعطرتبه روضه هوه عطر حمد ما رامت تقاوم جان تشمها بقّو ومن شدة ما هو مركز كحّت كحة من الخاطر..
وشوي ان ميره تدش عليها ..
ميره : بلاج اتكّحين ؟؟ وانتبهت لريحة العطر لان ريحنه كانت شاله البقعه..
ميره : حد من الرياييل دش الصاله؟ عنبو يا ريحته شلت البقعه شل
رفيعه : هههه لا والله هاذي رويض متعطره
ميره : يا حيها ومنو اللي معطرنها
رفيعه : وقلبها يدق لانها بتنطق بإسمه .. على قولتها حمد اللي معطرها
ميره : ( تشوف رفيعه بطرف عينها وتنغزها بالرمسه ) اهااااااا .. حمد
رفيعه : وليش تقولينها بهالطريقه؟
ميره : سلامتج الشيخه .. انزين عقب ما تخلصين تعالي الحجرة عسب نلعب بالكيرم..
رفيعه : كيرم!! منو وين يبتوها؟؟
ميره : الله يسلمج هفّيناها من ميلس الرياييل ..
رفيعه : أسميكن ما تنرامن.. تريّني بلّس رويضه وبيي
ميره : اوكيه نترياااااج..
وعقب العشا يلسوا الرياييل يسولفون برع وعقب دخلوا كلهم داخل عسب يرقدون .. ورقد بو راشد ويا حرمته في حجره وام مانع وام حمد وميود وعلاوي في حجره والبنات في حجرة ويد راشد رقد في حجرته اللي مسونها له على زاويه البيت من برع .. ورقدوا الشبيّّبه كلهم في الميلس .. رقد راشد على الغنفة الطويله .. ورقد غيث على الغنفه الثانيه .. وأما حمد ومانع فرشولهم تحت ورقدوا .. وعلى الساعه ثنتين فليل نشت رفيعه من الرقاد وكانت عطشانه ويوم سارت الصاله حصلت الدبه مخلصه .. لبست رفيعه شيلتها وسارت المطبخ ويوم خطفت جدام الميلس شافت الشبيّبه كلهم رقوود .. لمحت حمد راقد تحت وعرفته من غترته اللي كانت عداله وكان راد باللحاف على ويهه .. تأملته شوي بعدين خافت حد ينش ويشوفها في هالموقف .. فكملت دربها وسارت المطبخ وشربت ماي وهيه راده عيونها خانتها وصدت صوب حمد .. وهنيه رفيعه زاغت قبل دقيقيتين كان هنيه .. وين اختفى ؟!!
وحطت في بالها انه يمكن يكون برع .. ويوم سارت صوب دريشة الصاله وايجت منها .. وشافت حمد متلثم ويالس يحك ايدينه في بعض وكان متساند على مدعمية سيارته .. والصراااحه الجو كان وايد بارد ..
يلست رفيعه تتأمل حمد.. وشوي ان حمد يحط ايده على راسه ويهوّس عليه .. هنيه عرفت رفيعه ان حمد ما رقد لين الحين لأن راسه يعوره .. وحمد صدق كان راسه يعوره ودور في سيارته عن حبة بندول وما حصل وما رام يزعج حد أو أنه يوعييه من الرقاد ..
سارت رفيعه صوب الحجره وفتحت شنطة ميره وطلعت حبة بندول وسارت المطبخ وصبت كوب ماي ودخلت الميلس شوي شوي وبدون محد يحس فيها حطت الكوب والحبة عدال غترة حمد .. وردت رفيعه الحجرة ورقدت طبعا عقب ما فكرت في حمد .. وبالباجر الصبح كلهم نشوا على الساعه سبع الصبح وطبعا كانوا مصلين الصبح قبل.. ويلسوا الرياييل برع والحريم يلسن داخل يعابلن الريوق وعلى الساعه ثمان حطولهم الريوق.. وعقب الريوق شل حمد روضه ويلس يلعبها وشوي شوي ركبها السياره .. طلع حمد ورقه وكتب فيها شيء ..
.. ربّع حمد الورقه وحطها في مخباة روضه لانه يعرف ان رفيعه هيه الوحيده اللي تلبّس روضه ...
حمد : رواضي حبيبي سيري عند عموه رفيعه وخليها تبدل ثيابج ..
نزّل حمد روضه من السياره ورد حمد ويلس عند الرياييل .. ويوم دشّت روضه الحجرة حصلت رفيعه تتسبح وميره يالسه جدام المنظره تسحي شعرها..
ميره : شو رويضه .. تريقتي ولا بعدج؟
هزت روضه راسها على انها تريقت ..
ميره : تعالي حبيبي بلبسّج .. بعدها عموه في الحمام
شلت ميره روضه ويلست وياها على الارض ويوم عقت ثيابها حصلت شيء غريب في مخباها.. حطت ميره ايدها في مخبا روضه وطلعت الورقه .. ويوم فتحت الورقه حصلت مكتوب فيها ..
(( السلام عليج .. شحالج الشيخه ؟؟ ما بطوّل عليج بس بغيت أسألج اذا انتي اللي كنتي حاطة حبة البندول عدالي .. واذا كنتي انتي اقولج مشكوره من الخااطر لاني الصرااحه كنت محتاجلها وايد .. تسلمين الشيخه .. حمد بن سهيل )) ..
هنيه انصدمت ميره من اللي مكتوب .. وعرفت ان الرساله موجهه لرفيعه .. وأول مره حمد يسوي هالحركة .. ما جد سواها من قبل .. صح انه راعي سوالف وظحك بس مع ذالك حشيم ومرباي عدل مع ان ابوه متوفي .. وفجأة تظهر رفيعه من الحمام .. دسّت ميره الورقه في مخباها .. وكملت تلبيس روضه ..
رفيعه : ليش عذبتي عمرج ولبستي رويض .. جان خليتيني انا بلبّسها..
ميره : لا والله عادي ..
وهنيه ما عرفت ميره شو تسوي .. تعطي رفيعه الرساله أو انها تنسى أمرها ..
وعقب صلاة العصر ردوا كلهم دبي .. وأول ما وصلوا ردوا أهل العين دارهم وردت رفيعه ويا روضه بيتهم ..وفي دار الزين بالتحديد في حجرة حمد وعلى الساعه سبع المغرب ..
حمد يالس يسحي شعره جدام المنظره ويغني غنية يا طير سلم عالحبيب .. وشوي أن أمه تدخل عليه ..
ام حمد : تسبحّت ولا بعدك ؟؟
حمد : تسبحت غناتي ..
ام حمد : وين ؟؟ وين بهااا
حمد : الهير
ام حمد : بتلووف على حرمة ابوك
حمد : ان حصلت وقت بخطف عليهم
ام حمد : هيه غناتي سير صوبهم وسلم عليهم من اسبوعين محد ويّه صوبهم ..
حمد : ان شاء الله الشيخه ..
ام حمد : وشو بتسوي هناك ؟
حمد : الله يسلمج ربيعي سالم عازمنيه أنا ومانع وغيث والشباب عنده على العشا ..
ام حمد : في البيت ولا في العزبه؟
حمد :في البيت
ام حمد : يا حيكم
حمد : ووين غيث عيل ؟؟
ام حمد : يالس فيا مانع في الميلس
وسار حمد ووقف جدام امه وكان يعدل طربوشته
حمد : تامرين بشيء غناتي ؟
ام حمد : سلامتك .. بس عن السرعه
حمد : على هالخشم .. ويحبها على راسها ويطلع وعقب سار صوب مانع..
حمد : السلاام
مانع : هلا والله بغرشوب العين
حمد : يتحنحن
مانع : اسميك بتظوي رووس بنات الهير كلهن
حمد : وانته ليش غيران
مانع : على الشوووووو يا حسره .. كافي أن بنات دبي ظوّن راسي.. كان مانع يقصد ميره بهالجمله ... مانع يحب ميره حب ما يخطر على بال حد .. يحبها بس في حياته ما تجرأ وصارحها بحبه اتجاهها وحتى ميره نفس الحاله .. وهيه حاطه في بالها ان مانع دايما مطنشها .. بس العكس هوه الصح .. كان حمد يرقب اليوم اللي يسمع صوتها أو يشوف شكلها ومع انها تتغشى عنه ما تغير شعوره صوبها بالعكس زاااد وكبرت في عينه .. وكلامهم ما يتخطى سلام وسوالف على الطاير .. بس عيونهم تنطق بكلام ما ألّف معانيه شاعر..
حمد : منو قصدك ؟؟
مانع : يا خي ما جننا تأخرنا يالله قمنا نروح
ظحكوا حمد وغيث عليه لانه غيّر السالفه بطريقه تضحّك..
وعقب كلهم ركبوا سيارة حمد وروحوا ..
وفي دبي وبالتحديد في صالة قوم رفيعه .. أم رفيعه ورفيعه واليازيه وخليفه يالسين يسولفون..
خليفة : رفوع .. متى بتخلصون من الدوام ؟!
رفيعه : باجّلي ثلاث اسابيع .. بس المدارس بيخلصون عقب اسبوعين
اليازيه : وشمعنى انتوا ثلاث اسابيع ؟؟
رفيعه : لعاااااانه
أم خليفه : يالله ما شيء باجي .. هانت
خليفه : الله يوفجج
رفيعه : آآمييييين
خليفه : اقول اميه .. وين ريلج؟
ام خليفه : ابوك في الميلس وياه ريال وعمك ثاني..
خليفه : منو الريال ؟!
ام خليفه : فضل بن سيف
خليفه : من متى ؟؟
ام خليفه : الا من شوي ..
خليفه : يالله عيل بخليكم بسير صوبهم
كلهم : الله يحفظك..
سار خليفة عند ابوه في الميلس ويلس وياهم .. وتمت رفيعة واليازيه وأم خليفه يالسات في الصاله .. وشوي أن ام خليفه تقوم من محلها وتظهر برع وعند الباب ..
رفيعه : اميه وين بتسيرين؟
ام خليفه : بسير المطبخ بشوف رولا شو سوّت بالعشا ..
اليازيه : عمتيه تبيني افزعلج؟!
ام خليفه : لا غناااااتي ارتاحي انتي .. التعب هب زين لج.. وتروح صوب المطبخ..
رفيعه : هههههههههه جيه حامل ؟!
اليازيه : وليش لا؟
رفيعه : (عقب ما عدلت يلستها) يزّوي صدق ولا تتمصخرين؟!
اليازيه : صدق
رفيعه : والله .. مبروووووك
اليازيه : الله يبارك فيج
رفيعه : وفي أي شهر الحين ؟؟
اليازيه : الثاني
رفيعه : يعتي بتربين في اجازة الصيف
اليازيه : بإذن الله
رفيعه : ومتى سرتي المستشفى؟؟
اليازيه : اليوم صبح
رفيعه : اهااا .. وأخيرا بيكون لروضه أخو
اليازيه : وليش ما تكون اخت؟
رفيعه : وانتي شو تبين ؟
اليازيه : اللي اييبه الله حياه الله
رفيعه : لا صدق.. انتي شو في خاطرج ؟
اليازيه : الصرااحه خاطريه بولد .. وخليفه حان علّيه يبغي ولد
رفيعه : الله يرزقكم اياااااه
اليازيه : الله يسمع منج ان شاء الله
وفي نفس الوقت في بيت قوم راشد .. ميره وراشد وام راشد يالسين في الحوي ..
ام راشد : ميره متى بتخلصون من المدرسه ؟
ميره : عقب اسبوعين..
ام راشد : وانته بو سنيده متى بتخلص من الجامعه ؟؟
راشد : عقب ثلاث اسابيع
ام راشد : الله يوفجكم ..
راشد : عيل وين ابويه؟
ام راشد : عند عمك سالم ..
وقام راشد من محله ووقف
راشد : اوكيه عيل بخليكم ..
ام راشد : وين بتسير ما شيء باجي عن العشا
راشد : بسير ويا الشباب السينما ..
ام راشد : وشو لك من الحاله هناك؟
راشد :يقوولوولج منزلين فلم يديد .. انما اييه .. كلهم يمدحوووونه
ام راشد : الله يحفظك .. بس عن التأخير .. باجر عليك دوام ما فيّه الصبح اقيّل طرّووووق صوب حجرتك عسب أوعيك
راشد : بحاول
ميره : فديتك بو سنيده هاتلنا أسكريم باسكن روبنز وانته راد .. مشتهيتنه
راشد : كم واحد؟
ميره : ثنينه حقي وحق ميره .. لأنه محد غيرنا بيكون واعي
راشد أوكيه .. يالله عيل بخليكم
ام راشد وميره : الله يحفظك
ويسوي حركه لامه وهيه انه يبوس ايده وينفخ البوسه صووب امه .. و طلع برع .. ويلست ميره تسولف ويا امها وشوي ان مهره تتطب عليهم ..
مهره : باااااااااااااو
ام راشد : هبي هباج الله
ميره : ( تحب ايدها من ورا وجدام )الحمد لله والشكر
ام راشد : وين سرتي ما ييتي تيلسين ويانا ..
مهره : حسبي الله على ميود .. قص عليّه وخلاني ألعب وياه بمكعباته ..
أم راشد : ووينه هوه الحين ؟؟
مهره : عند رولا تعشّيه ..
ظنكم بيلووف حمد صوب حرمة بوه ؟
شو تسوي مهره بالرساله ؟
يا ترى هل بيلتقي حمد برفيعه أوأن مانع بيلتقي بميره ؟
شو المفاااجأة اللي بتتفاجأبها رفيعه وبيخليها تصيييييييح من الخاطر ؟؟