والله ان لي عزّةٍ تجري بدم الوريـد

هزّني شوفه وأنا اللي هقيت أني بعيد

واحسب أني لا تنحيّت عن دربـه سليـت

ما ضعفت إلا بشوفه وأنا قبله شديـد

واحسب اني قد نسيته مع اللي قـد نسيـت

حرّك اشواقٍ قديمه لها قلـبٍ عنيـد

رجّع الماضي وأنا اللي عن الماضي غفيت

فيه علّقت المشاعر وهو قلبـه حديـد

ابتـلاه الله بزينـه وأنـا فـيـه ابتلـيـت

طفل لا يدرا عواطف ولا يفهم قصيد

لا ملـت عينـه عطايـا ولا بكّـاه بـيـت

يوم مرّ بناظري ضيّع الراي السديـد

قمت أهوجس به وأنا اللي على فراقه قويت

من يقول مفارق اللي تبي فرقاه عيد؟

من يقول إن الجفا ريح والنسيـان بيـت؟؟

كلما طابت جروحي لفى جرحٍ جديد

وان بغيت انهض عزومي تعثرت وبكيـت

والله ان لي عزّةٍ تجري بدم الوريـد

ما أذكـر أنـي للمقفيـن ناديـت وعديـت

كم طويت آمال وآلام واستهونت غيد

روّحن بايـام عمـري ولا كنّـي دريـت

كم طمست بعزّتي نور خد ونور جيد

ارتفع بعيون حسنا وايـلا طاحـت رقيـت

لكن اللي عجّز الفكر هالطفل الوحيد

يسكن عيوني ولع كل مـا قلـت انتهيـت

إن بغيت وصال راح الوعد منّه وعيد

وان غفيت بليل فرقا على وجهه صحيـت

أحسب أن فرقاي ناره وقربي منه عيد

وأثر ما مثلـه كرهنـي ولا مثلـه هويـت

أمس كان العلم فيني يفيد ومـا يفيـد

وأمس لامن نبهّوني من الهـرج استحيـت

لكن اليوم انتهى العلم والزايـد يزيـد

دون ذاك الطفل ما والله أثنـي مـا نويـت