قصيدة الشريف بركات يوصي فيها ابنه مالك

إجعـل دروب المــرجله من معانيك = وإحـذر تميّـل عن درجهـا بمرقاك

لا تـنســدح عنها وتبغـاني اعـطيك = جـميـع مــايكـفيك ماحاصــل ٍ ذاك

أدب ولــدك إن كان تبغــاه يشفيك = واستسعفه من بعد مرباك يالاك

إمـا سمج واستسمجك عند شـانيك = ويفـر من فعـله صديقك وشـرواك

والا بعد جـهـله ترا هــــو بياذيك = لـو زعلت امــه لاتخــليه يــا لا ك

وإحذر تضّيع كـل من هـو ذخـر فيك = معــروفه لاتنسـاه واوفه بعرفاك

تـرى الصـنايع بين الاجــواد تشريك = إليا طمعـــت بغرسهـا لا تعــداك

وإحذر ســرور بغبة البحر يرميك = ولا عنده افـلس مـن تشكـّيك وبكاك

وأوف الرجـال حقوقهـا قبل تـعنيك = لا توفيه بالهـــرج فالحـق يقـفـاك

وهـرج النمـيمه والقفــا لا يجي فيك = وأيـاك عرض الغــافل أيـاي وإيـاك

تبـدي حديث ٍ للمــلا فيه تشكـيك = وتهــيم عند النـاس بالكـذب واشـراك

واليــا نويت إحذر تعلم بطـــاريك = كـم واحـد ٍ تبغى منه عرف وأغواك

وأحـذر شماتت صـاحب ٍ لك مصـافيك = وليـا جرالك جـاري ٍ قال لولاك

و لا تحـسب ٍ ان الله قطوع ٍ يخلـيك = و لا تفرح إن الله على النـاس بداك

الضـيف قـدم له هـلا حيـــن يلفيـك = وممـّــا تطوله يافتى الجـود يمنــاك

إحــذر تـلقي الضيف مقـرن علابــيك = خـله محب ٍ لك صديق ٍ ليا جاك

واوصيك زلا ت الرفيـق ان عثا فيك = مازال يغـّطاها الشعـر فا حتمل ذاك

راعــه ولو مـا شفت إنه مـراعيك = عســاك تكسـر نيته عن معـــــاداك

وإحـذر عدوك لو ظهــر لك مصــافيك = خـلك نبيه وراقــبه وين ماجاك

لا تـامنـه واطلـب من الله ينجــيك = ويكــفيك ربـك شـر ذو لا وذولاك

شفـني انـا يا بـوك بـآ مرك وانهـيك = عـن التعرض بين الاثنين حذراك

إذا حضـرت اطلابـة ٍٍ به شـرابيك = اســع لهم بالصــلح واللاش يفـداك

ابـذل لهــم بالطيب ربــك ينجــيك = ولا تجضع الميزان مع ذا ولا ذاك

أمـا الشـهـاده فادهـا إن دعوا فيك = بيـّن عمـود الدين لا عميت أريـاك

بالك تمـاشي واحـد ٍ لـك يرديـك = طـالع بني جنســك وفكــر بممشـاك

رافـق أصـيل ٍ فـي زمـانك يشـاكيك = لاشاف خملا تك عن الناس غطـّاك

وحـذراك عن طــرد المقـفي حـذاريك = عليك بالمقبل وخل من تعداك

ثم إلعن الشـيطان حذراك يغــــويـك = تــرى ان تبعـته للشــرابيك وداك

وأوصــيك لا تشــكي علينا بلاويك = انت السبب اطرفت عيـنك بيمنـاك

وإعرف تـرى اللـّي واطا الفعـرواطيك = ولاأنت أعـزمن الجماعه هذولاك

ألمـسك يـاراسي مـن الذل وأخطـيك = وأحـذر تكلم يالساني وحـــذراك

وألطف بجارك ثم قم دون عانيك = وافطن لما يعنيك عن ربعة اخواك

ياذيب وإن جتـك الغــنم في مفــاليك = فا كمن لهـا ياذيب لاما تعـــداك

فيما مضى ياذيب تفـرس بيـاديك = واليـوم جــاء ذيـب عن الفرس عداك

ياذيب عاهدني وعاهدك مــارميك = مرميك أنا ياذيب لو زان مـرماك

والنفـس خـا لف رايهـا قبل ترميك = ترى لهـا الشيطان يرمي با لاهلاك

ومن بعد ذا لاتصاحب النذل يعديك = عن صحبة الانــذال يابوك حذراك

والهقوة انـك ماتجـي دون أهـاليك = ولا ظن عود الورد يثمـر بتمباك

والحـر مثلك يسـتحي يصحب الديك = وإن صا حبه عاعا معاعات الادياك

لا تستمع قول الطرف يوم يلقيك = بالكـذب يقضي حاجته كل ماجاك

مـن نـّم لـك نـــّم بك ولا فيـه تشكيك = وألياه قد أزرى رفيــقك وزراك

عنـدك حـكا فيــنا وعندي حكــا فيك = وأصبــحت كارهنا وحنا كرهناك

مـاخطاك ماصابك ولو كان راميــك = واللـّي مصيبك لو تتقيت مخطاك

قصيده اقل مايقال عنها انها قمه في الروعه.

كانت عندي في الجوال حرام مايمر يوم الا وااسمعها>>> موسوس

اشكرك بروان على نقلها الينا

تحياتي :
أأســــ الجرووح ــــــير