السلام عليكم ورحمة الله وبركاته..

كيف يعاند الحظ انسان..؟
وكيف بلسانه ينهي حاله

ماتوقع انه نهايته بلسان
ولا يدري انه بيقتل نفسه بماله

خذوا قصة عبرتها بالافنان
لا يجي يوم يقولون شوفوا وش صار بجلاله

اليوم يا اعضاء يا كرام انقل لكم قصه سارت قدامي قصة احداثها سارت على مايزيد عن سنه كامله عايشتها وحسيت بحرقة صاحبها ... قصة للأسف علمت صاحبها كيف يكتم أفعاله..


بداية القصه أحب أوضح انه الاسامي اللي ابسردها هي اسامي غير حقيقية والسبب اني أخذتها من باب الستر عن اخيك المسلم..



خالد طالب جامعي في السنة التحضيرية في جامعـة البترول والمعادن واحده من اعرق الجامعات واصعبها في المملكة .. دخل خالد هذه الجامعه وهو كله فخر واعتزاز بالذات اعتزاز مو بس بالدين لا بدرجاته المشرفه في الثانوية العامة لأنه كان من أصحاب الدرجات العلا في الثانوية..

كانت الشهور الأولى له شهور صعبه نسبيا خصوصا انه آخر العنقود "مثل حالاتي " وارتباطه بالعائلة شي غير طبيعي لدرجة انه كان يشعر فيهم وشعره تحس فيه من الحرقه انه يبكيك ففي شعر كتبه يقول ..

مايحس بدمع طفل دمعته حراقه ..
إلا قلب حسه على دمعة وليده
قلب إن ضمك نساك دنيا غداره ...
قلب من كثر ما يحبك نسى جرحه وانينه
قلب أمي قلب يكتم أفراحه...
قلب يتسلى بفرحة ضنينه..
أحبك يا يمه واحزاني على فراقه...
وأغليك وربك شاهد على عبيده
نسيت حروفي يا يمه وشعري تلخبطة اوراقه..
وعانيت من غربيه مالها تصبيره
ودي أنام جنبك يا يمه وأنسى زمن وافعاله..
وتحسسيني بحنان فقده ولا عرفت أجيبه

وانتهى الترم الأول من السنه الدراسية شهد فيه تفوقه بمواد الانقليزي وضعفه بمادة الرياضيات ..

وفي الترم الثاني تعرف على مجموعة او خلنا نقول شله تجمعت وكل واحد ناسب الثاني وسارت طلعاتهم سوا كثيره .. وكانوا متشابهين بكل شي الحاله الماديه الحاله الإجتماعيه يعني سمن على عسل لكن اللي كان يفرق بينهم المستوى الدراسي بمواد الانقلش ..


في البداية خالد حُـذر من انه يبين مستواه الدراسي وانه من الافضل عدم التطرق الى موضوع الدراسه وخصوصا انه العين حق وهذا شي نشوفه بحياتنا ونسمع عنه كثير وفوق كذا انه الرسول عليه الصلاة والسلام قال انه العين حق ..

لكن خالد لا حياة لمن تنادي والسبب مثل ما عرفته وراه انقله نصـًا

"هذول شلتي وعزوتي مهما يكون ما راح يضروني "

ومرت الايام .. وخالد على نفس الحاله يجيب واجباته وللأسف انه في أفراد من شلته من أصحاب النفوس الركيكه اللي ما تعرف تذكر ربها على الرغم من تذكيرها بهل الشي وخالد الى الان مو مقتنع


الى ان صدم في النهاية بأنه ياخذ حـــــــــــر مــــــــان بمواد الانقلش اللي هي عموما أبرز ما يتقنه ..في حياته الجامعيه


-------------------


انا يا اخوان عموما ما جبت هل القصه عشان أشكليكم مأساة الرجال اللي الان متعذب نفسيا بسبب شي حق ويستاهل عليه لانه ما سمع نصيحه جاته لحد عنده..

أنا جبت هل القصه عشان نعرف حنا كطلاب جامعه او كطلاب عموما انه مهما كانت جمعتك او شلتك طيبه و لا تتمنى لك الشر لكـن لا توري انت وش تسوي في دراستك لانه صدقني راح تجي عن باب المزح ,, وتنصاب فيها مثل ما انصاب اخونا خـالد اللي الان يعاني من ضغط نفسي رهيب واللي الله يفرج همه وكربه ويحفظه انشاء الله لوالديه