عبيد رااااح ضحية شيله

أنا واعوذ بالله من كلمة أنا شاب في مقتبل العمر وأطمح زي غيري من الشباب وودي اصير صدقي (( عندي فلوس )) ومشكلتي ساكن مع اهلي في بيت طين ومافيه أمل نتجر الا اذا قالوا حدر بيتكم منجم ذهب ولا بـير بترول من الفقر.
ويوم من الايام وجدتي الحصي تقص علينا تبينا نرقد وتقول بتشوفون العز وتكثر دراهمكم قلت وشلون قالت بكره اقول لك نم ولا تشغلنا.
نمت ذاك اليوم والهوجاس طاقني وعشت في حلم كنت انا والوليد مع بعض وهو يأشر علي ويقول شوفوا ولد النعمه << ------ صدق وصار اتجر منه، وبعد ما اصبحنا نقزت ادور على جدتي وقالت امي انها راحت لبيت عمي.
ورحت لشنطتها الحديد ادور فيها ولقيت ديرم وحنا وجلال ولقيت شيله مصفطه ومحطوطه بكيس ومربوطه كنها دنبوشي وبعدها تليقفت وفكيت الشيله وصار مرسوم بها خريطه...؟؟
قلت بس هذي اللي تقصد جدتي وتبينا نكتشف الكنز بعد ما تموت..
اللي صاااار جمعت عفشي في تالي الليل وخذت غريضاتي وقمت امشي على اصبع.
واركب ذاك التكسي واعطيه الخريطه وقلت ودني لم ذا المكان.
ابو هنود ما صدق خبر خذ الخريطه وقام يقلب فيها يمين يسار ولا عرف شي؟؟
فكينا اللغز حق الخريطه ورحت للبر جنب غار بوادي نمار جنوب الرياض وقمت أحفر تقول أدور على مفاتيح ضايعه في الاخير ما لقيت شي ونطلني الهندي وكل يوم ادور في محل وكل يوم لي حفره ..
ورجعت لبيتنا وصاروا اهلي معلنين عني في الجريده ويوم رحت لبيتنا ما لقيت احد وصاروا اهلي ناقلين لقصر في شمال الرياض يعني صاروا عيال نعمه وتوفت جدتي وورثوها وصارت دافنه تحت بلاط الحوش خمس تنك جنيهات ذهب وقمت انشد عنهم في كل محل لين لقيتهم بقصر على أربع شوارع وطقيت الباب طلع علي هندي وسألته وقام ينفخ على كني اصغر عياله وعلى دخلت امي مع السواق وانا لابس خلقان مشققه امي ما عرفتني وعطتني خمسه ريال وقالت الله يعطيك وبعد ما تمقلت فيني عرفتني وقامت تصيح وتقول الحمد لله اللي رجع لي عبيدوووه وبعدها وريت امي الخريطه وعلمتها القصه ويوم شافت الشيله صاحت وقالت ياحبي لها امي هذي باقي الحنا حقها.
وصارت ذيك لاهيب خريطه ولا يحزنون وصار حنا يابس من جدتي الله يرحمهاا.



:D الله يكفينا شر الطمع


سندريلا